karun main kis tarah shikwa kisi se dil-figari ka

karūñ maiñ kis tarah shikva kisī se dil-figārī kā

ki dil bhūkā hai sau sau zaḳhm khā kar zaḳhm-kārī kā

gulistāñ par baḌā ehsān thā abr-e-bahārī kā

na hotā us ke dāman meñ jo sāmān barq-bārī kā

bahāreñ baar baar aa.iiñ chaman meñ gul khile lākhoñ

na aayā ek bhī jhoñkā idhar bād-e-bahārī kā

kinār-e-sindh guzrī hai mirī ik umr ai shabnam

salīqa mujh ko dariyā ne sikhāyā ashk-bārī kā

ġhamoñ ke jam.a karne meñ zarar hai ai dil-e-nādāñ

ki ahd-e-nau hai dushman sheva-e-sarmāya-dārī kā

azīzo dosto vo vaqt bhī ab aane vaalā hai

yaqīñ jab aa.egā tum ko mirī be-iḳhtyārī kā

riyā-kārī meñ ai 'mahrūm' tujh sā bhī koī hogā

ki har mahfil meñ charchā hai tirī parhez-gārī kā

karun main kis tarah shikwa kisi se dil-figari ka

ki dil bhuka hai sau sau zaKHm kha kar zaKHm-kari ka

gulistan par baDa ehsan tha abr-e-bahaari ka

na hota us ke daman mein jo saman barq-bari ka

bahaaren bar bar aain chaman mein gul khile lakhon

na aaya ek bhi jhonka idhar baad-e-bahaari ka

kinar-e-sindh guzri hai meri ek umr ai shabnam

saliqa mujh ko dariya ne sikhaya ashk-bari ka

ghamon ke jama karne mein zarar hai ai dil-e-nadan

ki ahd-e-nau hai dushman shewa-e-sarmaya-dari ka

azizo dosto wo waqt bhi ab aane wala hai

yaqin jab aaega tum ko meri be-iKHtyari ka

riya-kari mein ai 'mahrum' tujh sa bhi koi hoga

ki har mahfil mein charcha hai teri parhez-gari ka