fikr-e-dildari-e-gulzar karun ya na karun

fikr-e-dildāri-e-gulzār karūñ yā na karūñ

zikr-e-murġhān-e-giraftār karūñ yā na karūñ

qissa-e-sāzish-e-aġhyār kahūñ yā na kahūñ

shikva-e-yār-e-tarah-dār karūñ yā na karūñ

jaane kyā vaz.a hai ab rasm-e-vafā kī ai dil

vaz-e-derīna pe isrār karūñ yā na karūñ

jaane kis rañg meñ tafsīr kareñ ahl-e-havas

mad.h-e-zulf-o-lab-o-ruḳhsār karūñ yā na karūñ

yuuñ bahār aa.ī hai imsāl ki gulshan meñ sabā

pūchhtī hai guzar is baar karūñ yā na karūñ

goyā is soch meñ hai dil meñ lahū bhar ke gulāb

dāman o jeb ko gulnār karūñ yā na karūñ

hai faqat murġh-e-ġhazal-ḳhvāñ ki jise fikr nahīñ

mo.atadil garmi-e-guftār karūñ yā na karūñ

fikr-e-dildari-e-gulzar karun ya na karun

zikr-e-murghan-e-giraftar karun ya na karun

qissa-e-sazish-e-aghyar kahun ya na kahun

shikwa-e-yar-e-tarah-dar karun ya na karun

jaane kya waza hai ab rasm-e-wafa ki ai dil

waz-e-derina pe israr karun ya na karun

jaane kis rang mein tafsir karen ahl-e-hawas

madh-e-zulf-o-lab-o-ruKHsar karun ya na karun

yun bahaar aai hai imsal ki gulshan mein saba

puchhti hai guzar is bar karun ya na karun

goya is soch mein hai dil mein lahu bhar ke gulab

daman o jeb ko gulnar karun ya na karun

hai faqat murgh-e-ghazal-KHwan ki jise fikr nahin

moatadil garmi-e-guftar karun ya na karun