ye jaan-gudaz safar dam-e-KHwab ho na kahin

ye jāñ-gudāz safar dām-e-ḳhvāb ho na kahīñ

ravāñ hai jis meñ safīna sarāb ho na kahīñ

yuuñ hī utartā na jā sard gahre paanī meñ

chamaktā hai jo bahut sehr-e-āb ho na kahīñ

khaḌā jo jhāñktā hai kab se garm kamroñ meñ

galī meñ ThiThurā huā māhtāb ho na kahīñ

havā ye kaun sī chaltī hai ār-pār mire

khulā huā kisī ḳhvāhish kā baab ho na kahīñ

diloñ pe kyuuñ nahīñ kartīñ asar tirī bāteñ

zamīñ to Thiik hai paanī ḳharāb ho na kahīñ

ġhubār se bharī bojhal fazā hai dil pe muhīt

garaj rahā hai jo sar meñ sahāb ho na kahīñ

sajā.e phirtā hai vo jis ko coat par 'shāhīñ'

mire hī ḳhuuñ kā mahaktā gulāb ho na kahīñ

ye jaan-gudaz safar dam-e-KHwab ho na kahin

rawan hai jis mein safina sarab ho na kahin

yun hi utarta na ja sard gahre pani mein

chamakta hai jo bahut sehr-e-ab ho na kahin

khaDa jo jhankta hai kab se garm kamron mein

gali mein ThiThura hua mahtab ho na kahin

hawa ye kaun si chalti hai aar-par mere

khula hua kisi KHwahish ka bab ho na kahin

dilon pe kyun nahin kartin asar teri baaten

zamin to Thik hai pani KHarab ho na kahin

ghubar se bhari bojhal faza hai dil pe muhit

garaj raha hai jo sar mein sahab ho na kahin

sajae phirta hai wo jis ko coat par 'shahin'

mere hi KHun ka mahakta gulab ho na kahin