kaTa na koh-e-alam humse kohkan ki tarah

kaTā na koh-e-alam ham se kohkan kī tarah

badal sakā na zamāna tire chalan kī tarah

hazār baar kiyā ḳhūn-e-ārzū ham ne

jabīn-e-dahr pe phir bhī rahe shikan kī tarah

savād-e-shab kī ye tanhā.iyāñ bhī Dastī haiñ

ye chāñdnī bhī nazar aatī hai kafan kī tarah

tamām shahr hai begāna log nā-mānūs

vatan meñ apne haiñ ham ek be-vatan kī tarah

ḳhayāl-e-dost na hasrat na aarzū na umiid

ye dil hai ab kisī ujḌe hue chaman kī tarah

sukūn-e-qalb to kyā hai qarār-e-jāñ bhī luTā

tumhārī yaad bhī aa.ī to rāhzan kī tarah

'ajab nahīñ ki sar-e-shahr-e-ārzū 'nādir'

hamārā dil bhī jale sham'-e-anjuman kī tarah

kaTa na koh-e-alam hum se kohkan ki tarah

badal saka na zamana tere chalan ki tarah

hazar bar kiya KHun-e-arzu hum ne

jabin-e-dahr pe phir bhi rahe shikan ki tarah

sawad-e-shab ki ye tanhaiyan bhi Dasti hain

ye chandni bhi nazar aati hai kafan ki tarah

tamam shahr hai begana log na-manus

watan mein apne hain hum ek be-watan ki tarah

KHayal-e-dost na hasrat na aarzu na umid

ye dil hai ab kisi ujDe hue chaman ki tarah

sukun-e-qalb to kya hai qarar-e-jaan bhi luTa

tumhaari yaad bhi aai to rahzan ki tarah

'ajab nahin ki sar-e-shahr-e-arzu 'nadir'

hamara dil bhi jale sham'-e-anjuman ki tarah