kaTi patang ki manind Dolte ho tum

kaTī patañg kī mānind Dolte ho tum

mujhe vatan se nikāle ga.e lage ho tum

ye aur baat ki ab maslahat-shi.ār hue

qarīb mere bhī varna kabhī rahe ho tum

koī rafīq na manzil na koī raḳht-e-safar

ye kis ḳhumār meñ kis samt ko chale ho tum

fazā.eñ us kī tumheñ ab bhī yaad kartī haiñ

ki jis dayār meñ kuchh din rahe base ho tum

koī ummīd na va.ada na hausla koī

yaqīn hī nahīñ aatā chale ga.e ho tum

tumhāre ruup kā kundan batā rahā hai hameñ

kisī kī aag meñ ik umr tak jale ho tum

sukūñ kā ek bhī lamha nahīñ nasīb 'anvar'

mirā ḳhayāl hai mehvar se haT ga.e ho tum

kaTi patang ki manind Dolte ho tum

mujhe watan se nikale gae lage ho tum

ye aur baat ki ab maslahat-shiar hue

qarib mere bhi warna kabhi rahe ho tum

koi rafiq na manzil na koi raKHt-e-safar

ye kis KHumar mein kis samt ko chale ho tum

fazaen us ki tumhein ab bhi yaad karti hain

ki jis dayar mein kuchh din rahe base ho tum

koi ummid na wada na hausla koi

yaqin hi nahin aata chale gae ho tum

tumhaare rup ka kundan bata raha hai hamein

kisi ki aag mein ek umr tak jale ho tum

sukun ka ek bhi lamha nahin nasib 'anwar'

mera KHayal hai mehwar se haT gae ho tum