kaun dekhe meri shaKHon ke samar TuTe hue

kaun dekhe merī shāḳhoñ ke samar TuuTe hue

ghar se bāhar rāstoñ meñ haiñ shajar TuuTe hue

luT gayā din kā asāsa aur baaqī rah ga.e

shaam kī dahlīz par laal o guhar TuuTe hue

yād-e-yārāñ dil meñ aa.ī huuk ban kar rah ga.ī

jaise ik zaḳhmī parinda jis ke par TuuTe hue

raat hai aur aatī jaatī sā.ateñ āñkhoñ meñ haiñ

jaise ā.īne bisāt-e-ḳhvāb par TuuTe hue

ābgīne pattharoñ par sar-nigūñ hote ga.e

aur ham bach kar nikal aa.e magar TuuTe hue

mil ga.e miTTī meñ kyā kyā muntazir āñkhoñ ke ḳhvāb

kis ne dekhe haiñ sitāre ḳhaak par TuuTe hue

vo jo dil kī mamlikat thī bābarī masjid huī

bastiyāñ sunsān ghar vīrān dar TuuTe hue

kaun dekhe meri shaKHon ke samar TuTe hue

ghar se bahar raston mein hain shajar TuTe hue

luT gaya din ka asasa aur baqi rah gae

sham ki dahliz par lal o guhar TuTe hue

yaad-e-yaran dil mein aai huk ban kar rah gai

jaise ek zaKHmi parinda jis ke par TuTe hue

raat hai aur aati jati saaten aankhon mein hain

jaise aaine bisat-e-KHwab par TuTe hue

aabgine pattharon par sar-nigun hote gae

aur hum bach kar nikal aae magar TuTe hue

mil gae miTTi mein kya kya muntazir aankhon ke KHwab

kis ne dekhe hain sitare KHak par TuTe hue

wo jo dil ki mamlikat thi babari masjid hui

bastiyan sunsan ghar viran dar TuTe hue