kaun dil hai mere allah jo nashad nahin

kaun dil hai mire allāh jo nāshād nahīñ

kaun ghar hai mire allāh jo barbād nahīñ

nāznīñ jaan bhī leñ to koī bedād nahīñ

chūḌiyāñ haath meñ haiñ ḳhanjar-e-faulād nahīñ

ai nasīm-e-saharī saath liye jā sū-e-bām

nafas-e-radd hai naala nahīñ fariyād nahīñ

sabz-bāġh aap dikhā.eñ na ab āzādī ke

aap ke baaġh meñ to sarv bhī āzād nahīñ

chup se haiñ kuchh mire āġhosh meñ vo hashr ke din

ye vahī haiñ jinheñ paimān-e-vafā yaad nahīñ

dekhte rañg-e-hinā jaate haiñ maqtal kī taraf

haath meñ teġh nahīñ ḳhanjar-e-faulād nahīñ

hai tirī jeb par aaj aañkh nasheman ke evaz

bāġhbāñ ye to koī chor hai sayyād nahīñ

shor-e-qulqul meñ gum āvāz-e-azāñ hai ai shaiḳh

ye bahut ḳhuub kahī mai-kada ābād nahīñ

ek ik phuul ko ek ek kalī ko dekhā

haar meñ un ke hamārā dil-e-nāshād nahīñ

niklī haiñ hashr meñ duniyā kī purānī bāteñ

maiñ to kyā mere farishtoñ ko bhī ab yaad nahīñ

na girī barq magar aap gire ġhash khā kar

ye to a hazrat-e-mūsā koī uftād nahīñ

jis se aatā thā nasheman kā qafas meñ kuchh lutf

tere qurbān tirī aañkh vo sayyād nahīñ

dil se niklī hai ye dil hī meñ rahegī zālim

jā ke dīvār se Takrā.e vo fariyād nahīñ

kaam kartā thā jo ai charḳh tire parde meñ

vo nahīñ kaam meñ to lazzat-e-bedād nahīñ

ye bahut hai rahe dil par jo hukūmat qaa.em

aaj qabze meñ agar basra-o-baġhdād nahīñ

bū-e-ḳhūñ dete haiñ shīrīñ tire mehñdī lage haath

haath meñ laale ke ḳhūn-e-sar-e-farhād nahīñ

had se aage na baḌhe dekhiye mizhgān-e-darāz

chheḌne ke liye kam nashtar-e-fassād nahīñ

sho.arā aap ko bhī ḳhuub banāte haiñ 'riyāz'

sab ye kahte haiñ koī aap sā ustād nahīñ

kaun dil hai mere allah jo nashad nahin

kaun ghar hai mere allah jo barbaad nahin

naznin jaan bhi len to koi bedad nahin

chuDiyan hath mein hain KHanjar-e-faulad nahin

ai nasim-e-sahari sath liye ja su-e-baam

nafas-e-radd hai nala nahin fariyaad nahin

sabz-bagh aap dikhaen na ab aazadi ke

aap ke bagh mein to sarw bhi aazad nahin

chup se hain kuchh mere aaghosh mein wo hashr ke din

ye wahi hain jinhen paiman-e-wafa yaad nahin

dekhte rang-e-hina jate hain maqtal ki taraf

hath mein tegh nahin KHanjar-e-faulad nahin

hai teri jeb par aaj aankh nasheman ke ewaz

baghban ye to koi chor hai sayyaad nahin

shor-e-qulqul mein gum aawaz-e-azan hai ai shaiKH

ye bahut KHub kahi mai-kada aabaad nahin

ek ek phul ko ek ek kali ko dekha

haar mein un ke hamara dil-e-nashad nahin

nikli hain hashr mein duniya ki purani baaten

main to kya mere farishton ko bhi ab yaad nahin

na giri barq magar aap gire ghash kha kar

ye to a hazrat-e-musa koi uftad nahin

jis se aata tha nasheman ka qafas mein kuchh lutf

tere qurban teri aankh wo sayyaad nahin

dil se nikli hai ye dil hi mein rahegi zalim

ja ke diwar se Takrae wo fariyaad nahin

kaam karta tha jo ai charKH tere parde mein

wo nahin kaam mein to lazzat-e-bedad nahin

ye bahut hai rahe dil par jo hukumat qaem

aaj qabze mein agar basra-o-baghdad nahin

bu-e-KHun dete hain shirin tere mehndi lage hath

hath mein lale ke KHun-e-sar-e-farhad nahin

had se aage na baDhe dekhiye mizhgan-e-daraaz

chheDne ke liye kam nashtar-e-fassad nahin

shoara aap ko bhi KHub banate hain 'riyaz'

sab ye kahte hain koi aap sa ustad nahin