kaun hai kis ka KHaridar chalo chhoDo bhi

kaun hai kis kā ḳharīdār chalo chhoḌo bhī

haiñ sabhī raunaq-e-bāzār chalo chhoḌo bhī

koī zāhid hai na mai-ḳhvār chalo chhoḌo bhī

haiñ sabhī sāhab-e-kirdār chalo chhoḌo bhī

farq kyā mulzim-o-munsif meñ batāyā jaa.e

hai ye be-kār kī takrār chalo chhoḌo bhī

kuchh rusūmāt-e-kuhan haiñ ki nibāheñ kab tak

unsiyat muḳhlisī kirdār chalo chhoḌo bhī

laakh ab aap kiye jaa.eñ masīhā.ī to kyā

hai vahī dard kī jhankār chalo chhoḌo bhī

dil kī rāhoñ pe bhalā tum bhī chaloge kab tak

ḳhaar hī ḳhaar haiñ 'asrār' chalo chhoḌo bhī

kaun hai kis ka KHaridar chalo chhoDo bhi

hain sabhi raunaq-e-bazar chalo chhoDo bhi

koi zahid hai na mai-KHwar chalo chhoDo bhi

hain sabhi sahab-e-kirdar chalo chhoDo bhi

farq kya mulzim-o-munsif mein bataya jae

hai ye be-kar ki takrar chalo chhoDo bhi

kuchh rusumat-e-kuhan hain ki nibahen kab tak

unsiyat muKHlisi kirdar chalo chhoDo bhi

lakh ab aap kiye jaen masihai to kya

hai wahi dard ki jhankar chalo chhoDo bhi

dil ki rahon pe bhala tum bhi chaloge kab tak

KHar hi KHar hain 'asrar' chalo chhoDo bhi