kaun hai raja kaun hai rani

kaun hai raaja kaun hai raanī

jhūTī hai sab prem kahānī

kyā kahiye ab prem kahānī

haa.e zamāna haa.e javānī

husn-o-javānī donoñ faanī

ek fasāna ek kahānī

terī haqīqat raaz hī ab tak

kis ne apnī zaat hī jaanī

kyā hai bātin kyā hai zāhir

kaun hai baaqī kaun hai faanī

amrit-ras haiñ un kī bāteñ

madirā kā madh un kī javānī

muddat guzrī dil ko luTā.e

kyā chheḌeñ ab baat purānī

murda-dil meñ kyoñ aas aa.e

kyā deñ sūkhe dhaan ko paanī

jaisī guzrī achchhī guzrī

kyā dohrā.eñ raam kahānī

de hī diyā 'nāshād' unheñ dil

tum ne kisī kī ek na maanī

kaun hai raja kaun hai rani

jhuTi hai sab prem kahani

kya kahiye ab prem kahani

hae zamana hae jawani

husn-o-jawani donon fani

ek fasana ek kahani

teri haqiqat raaz hi ab tak

kis ne apni zat hi jaani

kya hai baatin kya hai zahir

kaun hai baqi kaun hai fani

amrit-ras hain un ki baaten

madira ka madh un ki jawani

muddat guzri dil ko luTae

kya chheDen ab baat purani

murda-dil mein kyon aas aae

kya den sukhe dhan ko pani

jaisi guzri achchhi guzri

kya dohraen ram kahani

de hi diya 'nashad' unhen dil

tum ne kisi ki ek na mani