kaun is bagh se ai baad-e-saba jata hai

kaun is baaġh se ai bād-e-sabā jaatā hai

rañg ruḳhsār se phūloñ ke uḌā jaatā hai

sho.ala-e-sham.a meñ garmī ye kahāñ se aa.ī

is kī garmī se to fānūs jalā jaatā hai

dil ke dhaḌkoñ kā ye aalam hai ki be-minnat-e-dast

purze ho ho ke garebān uḌā jaatā hai

rabt pahle jo tire yaad kabhī kartā huuñ

baiThe baiThe mujhe afsos sā aa jaatā hai

pūchhtā koī nahīñ kab se tire kūche meñ

dil kisī kā hai ki pāmāl huā jaatā hai

ga.e ve din ki tamannā hameñ ik ashk kī thī

ab to in āñkhoñ se dariyā sā bahā jaatā hai

shaam ke vaqt to koThe pe jo aatā hai kabhī

dekh kar tujh ko ye ḳhurshed chhupā jaatā hai

be-adab ke ta.iiñ mutlaq nahīñ sohbat kā shu.ūr

shāna kitnā tirī zulfoñ se lagā jaatā hai

yuuñ qadam rakh na zamīñ par tirī raftār se aah

dil kisī kā hai ki maaTī meñ milā jaatā hai

'mus.hafī' ishq kī vaadī meñ guzar hai kis kā

bhūlā-bhaTkā koī īdhar ko bhī aa jaatā hai

kaun is bagh se ai baad-e-saba jata hai

rang ruKHsar se phulon ke uDa jata hai

shoala-e-shama mein garmi ye kahan se aai

is ki garmi se to fanus jala jata hai

dil ke dhaDkon ka ye aalam hai ki be-minnat-e-dast

purze ho ho ke gareban uDa jata hai

rabt pahle jo tere yaad kabhi karta hun

baiThe baiThe mujhe afsos sa aa jata hai

puchhta koi nahin kab se tere kuche mein

dil kisi ka hai ki pamal hua jata hai

gae we din ki tamanna hamein ek ashk ki thi

ab to in aankhon se dariya sa baha jata hai

sham ke waqt to koThe pe jo aata hai kabhi

dekh kar tujh ko ye KHurshed chhupa jata hai

be-adab ke tain mutlaq nahin sohbat ka shuur

shana kitna teri zulfon se laga jata hai

yun qadam rakh na zamin par teri raftar se aah

dil kisi ka hai ki maTi mein mila jata hai

'mushafi' ishq ki wadi mein guzar hai kis ka

bhula-bhaTka koi idhar ko bhi aa jata hai