kaun kahta hai ki mar jaane se kuchh hasil nahin

kaun kahtā hai ki mar jaane se kuchh hāsil nahīñ

zindagī us kī hai mar jaanā jise mushkil nahīñ

haañ ye saarā khel parvānoñ kī jāñ-bāzī kā hai

sham-e-raushan par madār-e-girya-e-mahfil nahīñ

aam hī karnā paḌegā un ko faiz-e-iltifāt

ġhair hargiz iltifāt-e-ḳhās ke qābil nahīñ

muntaḳhab maiñ hī huā mashq-e-taġhāful ke liye

vo taġhāful-kesh merī yaad se ġhāfil nahīñ

halqa-e-girdāb hai gahvāra-e-ishrat mujhe

zauq-e-āsā.ish mirā minnat-kash-e-sāhil nahīñ

dekhiye kyā ho hamāre shauq-e-manzil kā ma.aal

paañv meñ tāqat ba-qadr-e-dūrī-e-manzil nahīñ

laakh dil qurbān us chashm-e-nadāmat-kesh par

ya.anī mujh ko ārzū-e-ḳhūñ-bahā-e-dil nahīñ

marja-e-barq-e-balā hai ai 'vafā' duniyā-e-ishq

hāsil-e-hasrat yahāñ juz hasrat-e-hāsil nahīñ

kaun kahta hai ki mar jaane se kuchh hasil nahin

zindagi us ki hai mar jaana jise mushkil nahin

han ye sara khel parwanon ki jaan-bazi ka hai

sham-e-raushan par madar-e-girya-e-mahfil nahin

aam hi karna paDega un ko faiz-e-iltifat

ghair hargiz iltifat-e-KHas ke qabil nahin

muntaKHab main hi hua mashq-e-taghaful ke liye

wo taghaful-kesh meri yaad se ghafil nahin

halqa-e-girdab hai gahwara-e-ishrat mujhe

zauq-e-asaish mera minnat-kash-e-sahil nahin

dekhiye kya ho hamare shauq-e-manzil ka maal

panw mein taqat ba-qadr-e-duri-e-manzil nahin

lakh dil qurban us chashm-e-nadamat-kesh par

yani mujh ko aarzu-e-KHun-baha-e-dil nahin

marja-e-barq-e-bala hai ai 'wafa' duniya-e-ishq

hasil-e-hasrat yahan juz hasrat-e-hasil nahin