kaun sa tan hai ki misl-e-ruh is mein tu nahin

kaun sā tan hai ki misl-e-rūh is meñ tū nahīñ

kaun gul hai jo tirā maskan ba-rañg-e-bū nahīñ

jām-e-nargis meñ kahāñ shabnam jo nikle āftāb

yaar ke aage mirī āñkhoñ meñ ik aañsū nahīñ

yād-e-gesū meñ huā merā ye dhajjī sā badan

mujh pe phabtī kahte haiñ mūbāf hai gesū nahīñ

jism aisā ghul gayā hai mujh marīz-e-ishq kā

dekh kar kahte haiñ sab tāvīz hai baazū nahīñ

dekhe haiñ hañsne meñ jis din se dur-e-dandān-e-yār

chain misl-e-gauhar-e-ġhaltāñ kisī pahlū nahīñ

ishq meñ badmast huuñ maiñ par koī vāqif nahīñ

nashsha hai jām-e-mai-e-ulfat meñ lekin bū nahīñ

zulf-e-jānāñ meñ nahīñ koī dil-e-vahshī asiir

ye ajab tātār hai jo ek bhī aahū nahīñ

ho gayā hai ye qirān-e-āftāb o māh-e-nau

yaar ke ruḳhsār-e-ātish-rañg par abrū nahīñ

ho gayā hai misl-e-mū tār-e-nigah apnā siyāh

aage āñkhoñ ke sanam jab se tire gesū nahīñ

raat din nāqūs kahte haiñ ba-āvāz-e-buland

dair se behtar hai kaaba gar butoñ meñ tū nahīñ

qumriyāñ dīvānī haiñ kyūñkar gale meñ ho na tauq

baaġh meñ ik sarv misl-e-qāmat-e-dil-jū nahīñ

kaun sa tan hai ki misl-e-ruh is mein tu nahin

kaun gul hai jo tera maskan ba-rang-e-bu nahin

jam-e-nargis mein kahan shabnam jo nikle aaftab

yar ke aage meri aankhon mein ek aansu nahin

yaad-e-gesu mein hua mera ye dhajji sa badan

mujh pe phabti kahte hain mubaf hai gesu nahin

jism aisa ghul gaya hai mujh mariz-e-ishq ka

dekh kar kahte hain sab tawiz hai bazu nahin

dekhe hain hansne mein jis din se dur-e-dandan-e-yar

chain misl-e-gauhar-e-ghaltan kisi pahlu nahin

ishq mein badmast hun main par koi waqif nahin

nashsha hai jam-e-mai-e-ulfat mein lekin bu nahin

zulf-e-jaanan mein nahin koi dil-e-wahshi asir

ye ajab tatar hai jo ek bhi aahu nahin

ho gaya hai ye qiran-e-aftab o mah-e-nau

yar ke ruKHsar-e-atish-rang par abru nahin

ho gaya hai misl-e-mu tar-e-nigah apna siyah

aage aankhon ke sanam jab se tere gesu nahin

raat din naqus kahte hain ba-awaz-e-buland

dair se behtar hai kaba gar buton mein tu nahin

qumriyan diwani hain kyunkar gale mein ho na tauq

bagh mein ek sarw misl-e-qamat-e-dil-ju nahin