kaun sayyaad idhar bahr-e-shikar aata hai

kaun sayyād idhar bahr-e-shikār aatā hai

tā.ir-e-dil qafas-e-tan meñ jo ghabrātā hai

zulf-e-mushkīñ kā jo is shoḳh ke dhyān aatā hai

zaḳhm se sīna-e-majrūh kā char jaatā hai

hijr meñ maut bhī aa.ī na mujhe sach hai masal

vaqt par kaun kisī ke koī kaam aatā hai

ab to allāh hai yārān-e-vatan kā hāfiz

dasht meñ josh-e-junūñ ham ko liye jaatā hai

Duub kar chāh-e-zaqan siina mirā dil niklā

qadd-e-ādam se sivā aab nazar aatā hai

muzhda ai dil ki masīhā ne diyā saaf javāb

ab koī dam ko laboñ par mirā dam aatā hai

teġh sī chaltī hai qātil kī dam-e-jañg zabāñ

sulh kā naam jo letā hai to haklātā hai

turra-e-kākul-e-pechāñ ruḳh-e-nūrānī par

chashma-e-ā.īna meñ saañp sā lahrātā hai

shauq tauf-e-haram-e-kū-e-sanam kā din raat

sūrat-e-naqsh-e-qadam Thokareñ khilvātā hai

dū-ba-dū āshiq-e-shaidā se vo hogā kyūñkar

aa.ine meñ bhī jo muñh dekhte sharmātā hai

saḳht pachhtāte haiñ ham de ke dil us ko 'sayyāh'

apnī afsos javānī pe hameñ aatā hai

kaun sayyaad idhar bahr-e-shikar aata hai

tair-e-dil qafas-e-tan mein jo ghabraata hai

zulf-e-mushkin ka jo is shoKH ke dhyan aata hai

zaKHm se sina-e-majruh ka char jata hai

hijr mein maut bhi aai na mujhe sach hai masal

waqt par kaun kisi ke koi kaam aata hai

ab to allah hai yaran-e-watan ka hafiz

dasht mein josh-e-junun hum ko liye jata hai

Dub kar chah-e-zaqan sina mera dil nikla

qadd-e-adam se siwa aab nazar aata hai

muzhda ai dil ki masiha ne diya saf jawab

ab koi dam ko labon par mera dam aata hai

tegh si chalti hai qatil ki dam-e-jang zaban

sulh ka nam jo leta hai to haklata hai

turra-e-kakul-e-pechan ruKH-e-nurani par

chashma-e-aina mein sanp sa lahraata hai

shauq tauf-e-haram-e-ku-e-sanam ka din raat

surat-e-naqsh-e-qadam Thokaren khilwata hai

du-ba-du aashiq-e-shaida se wo hoga kyunkar

aaine mein bhi jo munh dekhte sharmata hai

saKHt pachhtate hain hum de ke dil us ko 'sayyah'

apni afsos jawani pe hamein aata hai