kaun se jazbaat le kar tere pas aaya karun

kaun se jazbāt le kar tere paas aayā karūñ

tū batā kis zāviye se maiñ tujhe dekhā karūñ

ye bhī ik shart-e-safar hai ham-safar koī na ho

jis kisī bhī rāste ko tai karūñ tanhā karūñ

ai guzarte vaqt tū kab mere bas meñ aa.egā

lamha-e-parrāñ batā kab tak tirā pīchhā karūñ

halqa-e-ahbāb baḌhtā jā rahā hai din-ba-din

ab maiñ apne aap ko bhī aur kuchh gahrā karūñ

kyā tire hī qurb ke muhtāj the sab silsile

kuchh samajh meñ hī nahīñ aatā ki maiñ ab kyā karūñ

an-ginat bantī bigaḌtī ḳhvāhishoñ kī zad meñ huuñ

dil kahīñ Thahrā bhī ho maiñ dil kā kyā kahnā karūñ

mere milne vāloñ meñ se kaun miltā hai tujhe

tū kahāñ hai aur kaisā hai kise pūchhā karūñ

mujh meñ bhī terī tabī.at kā zarā sā rañg hai

tū nahīñ to kyuuñ na apne aap ko chāhā karūñ

mere sheroñ meñ tirī be-chārgī kā dukh bhī ho

kaash jo tū sochtā hai vo bhī maiñ likkhā karūñ

kyā se kyā hone kā dukh bhī kitnā karb-añgez hai

kis tavaqqo par 'riyāz' ab aa.ina dekhā karūñ

kaun se jazbaat le kar tere pas aaya karun

tu bata kis zawiye se main tujhe dekha karun

ye bhi ek shart-e-safar hai ham-safar koi na ho

jis kisi bhi raste ko tai karun tanha karun

ai guzarte waqt tu kab mere bas mein aaega

lamha-e-parran bata kab tak tera pichha karun

halqa-e-ahbab baDhta ja raha hai din-ba-din

ab main apne aap ko bhi aur kuchh gahra karun

kya tere hi qurb ke muhtaj the sab silsile

kuchh samajh mein hi nahin aata ki main ab kya karun

an-ginat banti bigaDti KHwahishon ki zad mein hun

dil kahin Thahra bhi ho main dil ka kya kahna karun

mere milne walon mein se kaun milta hai tujhe

tu kahan hai aur kaisa hai kise puchha karun

mujh mein bhi teri tabiat ka zara sa rang hai

tu nahin to kyun na apne aap ko chaha karun

mere sheron mein teri be-chaargi ka dukh bhi ho

kash jo tu sochta hai wo bhi main likkha karun

kya se kya hone ka dukh bhi kitna karb-angez hai

kis tawaqqo par 'riyaz' ab aaina dekha karun