kaun si wo shama thi jis ka main parwana hua

kaun sī vo sham.a thī jis kā maiñ parvāna huā

aur phir lau bhī lagī aisī ki dīvāna huā

sāqī-e-sar-mast se jab tak ki lene ko baḌhūñ

haath se girte hī chaknā-chūr paimāna huā

dil harīm-e-nāz se le kar to ham nikle magar

ho gayā aalam kuchh aisā sab se begāna huā

ḳhair thī ulfat meñ dil ne rañg kuchh badlā na thā

ab tamāsha dekhiyegā vo bhī dīvāna huā

ham ne jaane kyā kahā logoñ ne kyā samjhā use

sarguzisht-e-dard-e-dil thī jis kā afsāna huā

faiz saaqī ne badal dī sūrat-e-dil aur hī

pahle paimāna thā paimāna se mai-ḳhāna huā

mere lab tak aate aate kyuuñ chhalak jaatā hai 'shauq'

jām-e-rañgīñ sāġhar-e-mul yā ki paimāna huā

kaun si wo shama thi jis ka main parwana hua

aur phir lau bhi lagi aisi ki diwana hua

saqi-e-sar-mast se jab tak ki lene ko baDhun

hath se girte hi chakna-chur paimana hua

dil harim-e-naz se le kar to hum nikle magar

ho gaya aalam kuchh aisa sab se begana hua

KHair thi ulfat mein dil ne rang kuchh badla na tha

ab tamasha dekhiyega wo bhi diwana hua

hum ne jaane kya kaha logon ne kya samjha use

sarguzisht-e-dard-e-dil thi jis ka afsana hua

faiz saqi ne badal di surat-e-dil aur hi

pahle paimana tha paimana se mai-KHana hua

mere lab tak aate aate kyun chhalak jata hai 'shauq'

jam-e-rangin saghar-e-mul ya ki paimana hua