kausar ki halawat hai meri tishna-labi mein

kausar kī halāvat hai mirī tishna-labī meñ

masrūf huuñ maiñ mad.h-e-rasūl-e-arabī meñ

tanhā.ī meñ dam-sāz hai us mah kā tasavvur

kyoñ mauj-e-ziyā ho na mirī tīra-shabī meñ

hai husn bhī aḳhlāq bhī rahmat bhī karam bhī

makkī madanī hāshmī-o-muttalabī meñ

har husn kā mehvar hai vo ik zāt-e-muqaddas

har ilm kā jauhar hai ik ummī arabī meñ

har zarra nazar aatā hai ḳhurshīd-badāmāñ

jalve haiñ ajab se mire aaqā kī galī meñ

kis aañkh ne dekhā hai koī aap kā ham-sar

kis ko hai kalām aap kī ālī-nasabī meñ

ai chashm-e-karam terī masīhā.ī ke qurbāñ

kuchh farq hai shāyad mirī darmāñ-talabī meñ

'āzam' baḌī ne.amat hai ye ronā ye taḌapnā

har dard kā darmāñ hai is āh-e-saharī meñ

kausar ki halawat hai meri tishna-labi mein

masruf hun main madh-e-rasul-e-arabi mein

tanhai mein dam-saz hai us mah ka tasawwur

kyon mauj-e-ziya ho na meri tira-shabi mein

hai husn bhi aKHlaq bhi rahmat bhi karam bhi

makki madani hashmi-o-muttalabi mein

har husn ka mehwar hai wo ek zat-e-muqaddas

har ilm ka jauhar hai ek ummi arabi mein

har zarra nazar aata hai KHurshid-badaman

jalwe hain ajab se mere aaqa ki gali mein

kis aankh ne dekha hai koi aap ka ham-sar

kis ko hai kalam aap ki aali-nasabi mein

ai chashm-e-karam teri masihai ke qurban

kuchh farq hai shayad meri darman-talabi mein

'azam' baDi neamat hai ye rona ye taDapna

har dard ka darman hai is aah-e-sahari mein