KHak jina hai agar maut se Darna hai yahi

ḳhaak jiinā hai agar maut se Darnā hai yahī

havas-e-zīst ho is darja to marnā hai yahī

qulzum-e-ishq meñ haiñ nafā o salāmat donoñ

is meñ Duube bhī to kyā paar utarnā hai yahī

qaid-e-gesū se bhalā kaun rahegā āzād

terī zulfoñ kā jo shānoñ pe bikharnā hai yahī

ai ajal tujh se bhī kyā ḳhaak rahegī ummīd

vaada kar ke jo tirā roz mukarnā hai yahī

aur kis vaz.a ke juuyā haiñ urūsān-e-bahisht

haiñ kafan surḳh shahīdoñ kā sañvarnā hai yahī

had hai pastī kī ki pastī ko bulandī jaanā

ab bhī ehsās ho is kā to ubharnā hai yahī

tujh se kyā sub.h talak saath nibhegā ai umr

shab-e-furqat kī jo ghaḌiyoñ kā guzarnā hai yahī

ho na māyūs ki hai fat.h kī taqrīb shikast

qalb-e-momin kā mirī jaan nikharnā hai yahī

naqd-e-jāñ nazr karo sochte kyā ho 'jauhar'

kaam karne kā yahī hai tumheñ karnā hai yahī

KHak jina hai agar maut se Darna hai yahi

hawas-e-zist ho is darja to marna hai yahi

qulzum-e-ishq mein hain nafa o salamat donon

is mein Dube bhi to kya par utarna hai yahi

qaid-e-gesu se bhala kaun rahega aazad

teri zulfon ka jo shanon pe bikharna hai yahi

ai ajal tujh se bhi kya KHak rahegi ummid

wada kar ke jo tera roz mukarna hai yahi

aur kis waza ke juya hain urusan-e-bahisht

hain kafan surKH shahidon ka sanwarna hai yahi

had hai pasti ki ki pasti ko bulandi jaana

ab bhi ehsas ho is ka to ubharna hai yahi

tujh se kya subh talak sath nibhega ai umr

shab-e-furqat ki jo ghaDiyon ka guzarna hai yahi

ho na mayus ki hai fath ki taqrib shikast

qalb-e-momin ka meri jaan nikharna hai yahi

naqd-e-jaan nazr karo sochte kya ho 'jauhar'

kaam karne ka yahi hai tumhein karna hai yahi