KHak par KHak ki Dheriyan rah gain

ḳhaak par ḳhaak kī Dheriyāñ rah ga.iiñ

aadmī uTh ga.e nekiyāñ rah ga.iiñ

kis kī ta.alīm kā āḳhirī saal thā

chūḌiyāñ bik ga.iiñ bāliyāñ rah ga.iiñ

ishq ik ruup thā husn kī dhuup kā

yaad kyuuñ dhuup kī saḳhtiyāñ rah ga.iiñ

ḳhuun meñ ghul ga.iiñ sāñvlī qurbateñ

tan meñ taptī huī haDDiyāñ rah ga.iiñ

dard añgūr kī bel the phal ga.e

ġham-kashoñ ke liye talḳhiyāñ rah ga.iiñ

arsa-e-fisq meñ qismat-e-ishq meñ

hikmat-āmez paspā.iyāñ rah ga.iiñ

qumqumoñ kī tarah qahqahe jal bujhe

mez par chaa.e kī pyāliyāñ rah ga.iiñ

us bulandī pe ham ne paḌāv kiyā

jis ke aage faqat pastiyāñ rah ga.iiñ

husn ke haath se ā.īna gir paḌā

farsh-e-pindār par kirchiyāñ rah ga.iiñ

ham ne kāġhaz ko bhī aa.ina kar diyā

lekin apnī siyah-baḳhtiyāñ rah ga.iiñ

KHak par KHak ki Dheriyan rah gain

aadmi uTh gae nekiyan rah gain

kis ki talim ka aaKHiri sal tha

chuDiyan bik gain baaliyan rah gain

ishq ek rup tha husn ki dhup ka

yaad kyun dhup ki saKHtiyan rah gain

KHun mein ghul gain sanwli qurbaten

tan mein tapti hui haDDiyan rah gain

dard angur ki bel the phal gae

gham-kashon ke liye talKHiyan rah gain

arsa-e-fisq mein qismat-e-ishq mein

hikmat-amez paspaiyan rah gain

qumqumon ki tarah qahqahe jal bujhe

mez par chae ki pyaliyan rah gain

us bulandi pe hum ne paDaw kiya

jis ke aage faqat pastiyan rah gain

husn ke hath se aaina gir paDa

farsh-e-pindar par kirchiyan rah gain

hum ne kaghaz ko bhi aaina kar diya

lekin apni siyah-baKHtiyan rah gain