KHaksari se jo ghafil dil-e-ghammaz hua

ḳhāksārī se jo ġhāfil dil-e-ġhammāz huā

ḳhaak ke parde meñ poshīda mirā raaz huā

le gayā ḳhat jo kabūtar kī tarah tā.ir-e-dil

zulf ke jaal meñ phañste hī girah-bāz huā

saaz ke parde meñ kī tū ne hukūmat sab par

na.e qānūn se tayyār tirā saaz huā

hairatī fasl-e-chaman meñ huī sarsabz aisī

sabza ruḳhsāra-e-tasvīr se āġhāz huā

raat sharmā ke tire bāloñ se rū-posh huī

zāġh-e-shab ke liye gesū par-e-parvāz huā

koThe par chehra-e-pur-nūr dikhāyā sar-e-shām

yaar se raj.at-e-ḳhurshīd kā e.ajāz huā

chaman-e-dahr meñ the dīda-e-unqā nargis

jab se maiñ shefta-e-chashm-e-fusūñ-sāz huā

sifat-e-ābla mīnā-e-falak TuuT gayā

kyā qayāmat tirī raftār kā andāz huā

jab huā mahv-e-adā baaġh meñ vo ḳhusrav-e-husn

phūloñ ke aks se gulgūñ faras-e-nāz huā

aap muñh dekhne ko ā.īna-e-dil māñgā

tasfiya us but-e-kāfir se ḳhudā saaz huā

arsa-e-dahr meñ bāñdhā jo tilism-e-ulfat

dushman-e-jāñ falak-e-shobada-pardāz huā

jaan letā hai tirī tīr-e-nigah se sab kī

ai parī paik-e-qazā bhī qadar-andāz huā

sumbul-e-āh huā turra-e-shamshād-e-bahisht

ham-baġhal mujh se jo vo sarv sar-afrāz huā

us se kuchh kah ke mujhe zab.h kiyā bātoñ meñ

tez-tar teġh-e-ajal se lab-e-ġhammāz huā

log karte haiñ kamāl-e-ruḳh-e-zebā kā vasf

ḳhalq ko yaad tirā mus.haf-e-e.ajāz huā

ai muġhannī dil-e-nādāñ nikal aayā bāhar

aaj be-parda zamāna meñ tirā saaz huā

roz-e-furqat ne kiyā tā.ir-e-dil ko haijān

gul-e-ḳhurshīd mujhe jañgal-e-shahbāz huā

bosa māñgā na gayā hoñToñ kā ai rashk-e-parī

rañg missī kā mujhe surma-e-āvāz huā

nashsha-e-ġhamza-o-andāz se sarshār huuñ maiñ

kāsa-e-umr-e-ravāñ jām-e-mai-e-nāz huā

tar-dimāġhī jo baḌhe nashsha-e-ma.anī kī 'munīr'

kāsa-e-sar mujhe jām-e-mai-e-shīrāz huā

KHaksari se jo ghafil dil-e-ghammaz hua

KHak ke parde mein poshida mera raaz hua

le gaya KHat jo kabutar ki tarah tair-e-dil

zulf ke jal mein phanste hi girah-baz hua

saz ke parde mein ki tu ne hukumat sab par

nae qanun se tayyar tera saz hua

hairati fasl-e-chaman mein hui sarsabz aisi

sabza ruKHsara-e-taswir se aaghaz hua

raat sharma ke tere baalon se ru-posh hui

zagh-e-shab ke liye gesu par-e-parwaz hua

koThe par chehra-e-pur-nur dikhaya sar-e-sham

yar se rajat-e-KHurshid ka eajaz hua

chaman-e-dahr mein the dida-e-unqa nargis

jab se main shefta-e-chashm-e-fusun-saz hua

sifat-e-abla mina-e-falak TuT gaya

kya qayamat teri raftar ka andaz hua

jab hua mahw-e-ada bagh mein wo KHusraw-e-husn

phulon ke aks se gulgun faras-e-naz hua

aap munh dekhne ko aaina-e-dil manga

tasfiya us but-e-kafir se KHuda saz hua

arsa-e-dahr mein bandha jo tilism-e-ulfat

dushman-e-jaan falak-e-shobada-pardaz hua

jaan leta hai teri tir-e-nigah se sab ki

ai pari paik-e-qaza bhi qadar-andaz hua

sumbul-e-ah hua turra-e-shamshad-e-bahisht

ham-baghal mujh se jo wo sarw sar-afraaz hua

us se kuchh kah ke mujhe zabh kiya baaton mein

tez-tar tegh-e-ajal se lab-e-ghammaz hua

log karte hain kamal-e-ruKH-e-zeba ka wasf

KHalq ko yaad tera mushaf-e-eajaz hua

ai mughanni dil-e-nadan nikal aaya bahar

aaj be-parda zamana mein tera saz hua

roz-e-furqat ne kiya tair-e-dil ko haijaan

gul-e-KHurshid mujhe jangal-e-shahbaz hua

bosa manga na gaya honTon ka ai rashk-e-pari

rang missi ka mujhe surma-e-awaz hua

nashsha-e-ghamza-o-andaz se sarshaar hun main

kasa-e-umr-e-rawan jam-e-mai-e-naz hua

tar-dimaghi jo baDhe nashsha-e-mani ki 'munir'

kasa-e-sar mujhe jam-e-mai-e-shiraaz hua