Khaal-e-ruKH usne dikhaya na dobara apna

ḳhāl-e-ruḳh us ne dikhāyā na dobārā apnā

chande ik aur hai gardish meñ sitārā apnā

dil o diin va ḳhirad o sabr kujā kū ārām

ghar luTā ham ne diyā ishq meñ saarā apnā

bolī sayyād se bulbul ki na kar gul se judā

taḳhta-e-bāġh hai ye taḳht-e-hazārā apnā

sair kī ham ne jo kal mahfil-e-ḳhāmoshāñ kī

na to begāna hī bolā na pukārā apnā

misl-e-nai ham ne to fariyād bahut kī lekin

koī hamdam na huā aah hamārā apnā

dil huā chāh-e-zaqan hī meñ ġharīq-e-rahmat

is meñ ġhavvās-e-nazar garche utārā apnā

khul gayā uqda-e-hastī-o-adam misl-e-habāb

lab-e-dariyā pe huā jab ki guzārā apnā

pairahan us ko huā ḳhil.at-e-shāhī ki 'nasīr'

jis ne ye pairahan-e-ḳhāk utārā apnā

KHal-e-ruKH us ne dikhaya na dobara apna

chande ek aur hai gardish mein sitara apna

dil o din wa KHirad o sabr kuja ku aaram

ghar luTa hum ne diya ishq mein sara apna

boli sayyaad se bulbul ki na kar gul se juda

taKHta-e-bagh hai ye taKHt-e-hazara apna

sair ki hum ne jo kal mahfil-e-KHamoshan ki

na to begana hi bola na pukara apna

misl-e-nai hum ne to fariyaad bahut ki lekin

koi hamdam na hua aah hamara apna

dil hua chah-e-zaqan hi mein ghariq-e-rahmat

is mein ghawwas-e-nazar garche utara apna

khul gaya uqda-e-hasti-o-adam misl-e-habab

lab-e-dariya pe hua jab ki guzara apna

pairahan us ko hua KHilat-e-shahi ki 'nasir'

jis ne ye pairahan-e-KHak utara apna