Khaal-e-ruKHsar ko dagh-e-mah-e-kaamil bandha

ḳhāl-e-ruḳhsār ko dāġh-e-mah-e-kāmil bāñdhā

chashm-e-maḳhmūr ko kaunain kā hāsil bāñdhā

ham ne is shahr-e-sitamgar ke har ik zarre ko

zauq-e-sajda kī qasam sajda-gah-e-dil bāñdhā

ham ne har vādī-e-pur-ḳhār ko zīnat baḳhshī

sar pe har ḳhaar ke ik turra-e-manzil bāñdhā

koī dekhe to sahī hausla-mandī apnī

ham ne tūfān kī har ik mauj ko sāhil bāñdhā

jazba-e-dil ko ba-andāz-e-digar maiñ ne 'hayāt'

kabhī kashtī kabhī tūfāñ kabhī sāhil bāñdhā

KHal-e-ruKHsar ko dagh-e-mah-e-kaamil bandha

chashm-e-maKHmur ko kaunain ka hasil bandha

hum ne is shahr-e-sitamgar ke har ek zarre ko

zauq-e-sajda ki qasam sajda-gah-e-dil bandha

hum ne har wadi-e-pur-KHar ko zinat baKHshi

sar pe har KHar ke ek turra-e-manzil bandha

koi dekhe to sahi hausla-mandi apni

hum ne tufan ki har ek mauj ko sahil bandha

jazba-e-dil ko ba-andaz-e-digar main ne 'hayat'

kabhi kashti kabhi tufan kabhi sahil bandha