KHam hai meri mohabbat warna ye aalam na ho

ḳhaam hai merī mohabbat varna ye aalam na ho

vo ḳhalish bhī kyā ḳhalish hai dil meñ jo paiham na ho

rāz-e-sar-basta na khul jaa.e hañsī ke ba.ad bhī

un kī mahfil meñ koī fitrat-shanās-e-ġham na ho

de sake ab tak na dastūr-e-vafā tartīb tum

kyā ruke dīvār jab buniyād mustahkam na ho

jaate jaate bazm-e-ahl-e-ġham pe ho ye bhī karam

aap is andāz se uTheñ ki ye barham na ho

kaun kho.e zarf apnā varna ai pīr-e-muġhāñ

mere sāġhar meñ bhī mai zauq-e-talab se kam na ho

jab bhī aa.e zaḳhm-e-dil ko aur taaza kar ga.e

aise ġham-ḳhvāroñ se behtar hai koī hamdam na ho

is gumāñ ko bhī nazar-andāz kar sakte nahīñ

muntahā-e-irtiqā barbādi-e-ālam na ho

KHam hai meri mohabbat warna ye aalam na ho

wo KHalish bhi kya KHalish hai dil mein jo paiham na ho

raaz-e-sar-basta na khul jae hansi ke baad bhi

un ki mahfil mein koi fitrat-shanas-e-gham na ho

de sake ab tak na dastur-e-wafa tartib tum

kya ruke diwar jab buniyaad mustahkam na ho

jate jate bazm-e-ahl-e-gham pe ho ye bhi karam

aap is andaz se uThen ki ye barham na ho

kaun khoe zarf apna warna ai pir-e-mughan

mere saghar mein bhi mai zauq-e-talab se kam na ho

jab bhi aae zaKHm-e-dil ko aur taza kar gae

aise gham-KHwaron se behtar hai koi hamdam na ho

is guman ko bhi nazar-andaz kar sakte nahin

muntaha-e-irtiqa barbaadi-e-alam na ho