خامۂ-عنبر فشاں سوں ہے ثنا سبحان کا

خامۂ عنبر فشاں سوں ہے ثنا سبحان کا

جس کوں لائق ہے اولھانا خلق پر احسان کا

متصف ہے ذات اوس کی باصفت ہائے کمال

دور ہے اس ذات سوں نام و نشاں نقصان کا

بے زباں بے حرف بے آواز نت ہے وہ کلیم

از کلام نفسیٔ خود جوں کہ خطرہ جان کا

ذات مطلق متصف ہو کر تمام اوصاف سیں

نام مومن پائیاں ممکن ہوا ایمان کا

یہ سخن کشفی شہودی ہے بری تقلید سوں

دست رس اس میں نیں ہر جان اور انجان کا

اقتباس نورؔ کیتا نور اوس خورشید سوں

ہور اجازت تس کرم سوں دوسرے دوران کا