KHamosh andheri raaton mein jab sari duniya suti hai

ḳhāmosh añdherī rātoñ meñ jab saarī duniyā suutī hai

ik hijr kā maarā rotā hai aur shabnam aañsū dhotī hai

pahle to mohabbat rafta rafta hosh-o-ḳhirad ko khotī hai

phir yaad kisī kī aa aa kar kāñTe se dil meñ chubhotī hai

kuchh sochtā huuñ kuchh kahtā huuñ kuchh kahte haiñ kuchh suntā huuñ

jab un ke sāmne hotā huuñ merī ye hālat hotī hai

chāragar bas ye batlā de vo jab mujh se chhū jaate haiñ

kyuuñ jism meñ maujeñ uThtī haiñ kyuuñ nabz meñ sur.at hotī hai

sab kahte haiñ maiñ dīvāna huuñ haiñ kahtā huuñ sab dīvāne haiñ

maiñ duniyā-bhar par hañstā huuñ duniyā-bhar mujh par rotī hai

jab chāñd ufuq par hotā hai aur taare jhilmil karte haiñ

āñkhoñ meñ kisī kī bholī bholī shakl samā.ī hotī hai

ummīd se rishta TuuT gayā tum kyā chhūTe dil chhūT gayā

armānoñ kī baḌhtī khetī ko sail-e-yās Dubotī hai

dil ek na ik din jaanā thā ye din bhī āḳhir aanā thā

'tālib' tum is kā ġham na karo ye chiiz parā.ī hotī hai

KHamosh andheri raaton mein jab sari duniya suti hai

ek hijr ka mara rota hai aur shabnam aansu dhoti hai

pahle to mohabbat rafta rafta hosh-o-KHirad ko khoti hai

phir yaad kisi ki aa aa kar kanTe se dil mein chubhoti hai

kuchh sochta hun kuchh kahta hun kuchh kahte hain kuchh sunta hun

jab un ke samne hota hun meri ye haalat hoti hai

chaaragar bas ye batla de wo jab mujh se chhu jate hain

kyun jism mein maujen uThti hain kyun nabz mein surat hoti hai

sab kahte hain main diwana hun hain kahta hun sab diwane hain

main duniya-bhar par hansta hun duniya-bhar mujh par roti hai

jab chand ufuq par hota hai aur tare jhilmil karte hain

aankhon mein kisi ki bholi bholi shakl samai hoti hai

ummid se rishta TuT gaya tum kya chhuTe dil chhuT gaya

armanon ki baDhti kheti ko sail-e-yas Duboti hai

dil ek na ek din jaana tha ye din bhi aaKHir aana tha

'talib' tum is ka gham na karo ye chiz parai hoti hai