KHamosh hain KHamosh magar dekh rahe hain

ḳhāmosh haiñ ḳhāmosh magar dekh rahe haiñ

ham dekhne vāloñ kī nazar dekh rahe haiñ

tārīk fazāo meñ bhī jugnū koī chamkā

aaj apnī duāoñ kā asar dekh rahe haiñ

kyā baat hai kyā raaz bane kyā ho gayā āḳhir

kyoñ aap ko bā-dīda-e-tar dekh rahe haiñ

ḳhud maut se Takrāne kā jin ko hai salīqa

mar ke bhī vo apne ko amar dekh rahe haiñ

dekhā na hameñ muḌ ke bhī ik baar kisī ne

ham shauq se tā-hadd-e-nazar dekh rahe haiñ

kyā jāniye is raah se kab un kā guzar ho

muddat se magar rāhguzar dekh rahe haiñ

KHamosh hain KHamosh magar dekh rahe hain

hum dekhne walon ki nazar dekh rahe hain

tarik fazao mein bhi jugnu koi chamka

aaj apni duaon ka asar dekh rahe hain

kya baat hai kya raaz bane kya ho gaya aaKHir

kyon aap ko ba-dida-e-tar dekh rahe hain

KHud maut se Takrane ka jin ko hai saliqa

mar ke bhi wo apne ko amar dekh rahe hain

dekha na hamein muD ke bhi ek bar kisi ne

hum shauq se ta-hadd-e-nazar dekh rahe hain

kya jaaniye is rah se kab un ka guzar ho

muddat se magar rahguzar dekh rahe hain