KHamosh hun main lab pe shikayat to nahin hai

ḳhāmosh huuñ maiñ lab pe shikāyat to nahīñ hai

fariyād karūñ ye mirī aadat to nahīñ hai

jo mauj-e-ġham-o-dard uThī hai mire dil meñ

hañgāma to be-shak hai qayāmat to nahīñ hai

shāyad mujhe mil jaa.e mire dard kā darmāñ

ummīd sahī chain kī hālat to nahīñ hai

fursat meñ mujhe yaad bhī kar lījiye ik din

ye arz mohabbat kī alāmat to nahīñ hai

mil jaa.e sar-e-rāh kisī moḌ pe koī

ik hādsa be-shak hai rifāqat to nahīñ hai

insāf jise haq kā taraf-dār kaheñ sab

is mulk meñ qaa.em vo adālat to nahīñ hai

kyuuñ ghar se nikalte hue Darte haiñ yahāñ log

is shahr meñ qānūn-e-hifāzat to nahīñ hai

allāh razā par tirī raazī hī rahūñgī

ho shikva zabāñ par ye jasārat to nahīñ hai

ābād rahā dil meñ vahī ek 'sabīla'

ab ġhair ko aane kī ijāzat to nahīñ hai

KHamosh hun main lab pe shikayat to nahin hai

fariyaad karun ye meri aadat to nahin hai

jo mauj-e-gham-o-dard uThi hai mere dil mein

hangama to be-shak hai qayamat to nahin hai

shayad mujhe mil jae mere dard ka darman

ummid sahi chain ki haalat to nahin hai

fursat mein mujhe yaad bhi kar lijiye ek din

ye arz mohabbat ki alamat to nahin hai

mil jae sar-e-rah kisi moD pe koi

ek hadsa be-shak hai rifaqat to nahin hai

insaf jise haq ka taraf-dar kahen sab

is mulk mein qaem wo adalat to nahin hai

kyun ghar se nikalte hue Darte hain yahan log

is shahr mein qanun-e-hifazat to nahin hai

allah raza par teri raazi hi rahungi

ho shikwa zaban par ye jasarat to nahin hai

aabaad raha dil mein wahi ek 'sabila'

ab ghair ko aane ki ijazat to nahin hai