KHamosh is tarah se na jal kar dhuan uTha

ḳhāmosh is tarah se na jal kar dhuāñ uThā

ai sham.a kuchh to bol kabhī to zabāñ uThā

but ban ke chupke fitne na yuuñ merī jaañ uThā

muñh meñ agar zabāñ hai to lutf-e-zabāñ uThā

hai kosoñ duur manzil-e-anjām-e-guftugū

tezī ke saath apne qadam ai zabāñ uThā

Dar hai yahī ki kashtī-e-mazmūñ na Duub jaa.e

rah rah ke itnī maujeñ na bahr-e-zabāñ uThā

ab daur meñ hai rindoñ ke paimāna-e-kalām

phir aa ga.ī bahār phir abr-e-zabāñ uThā

kar is qadar na zauq-e-takallum ko sharmsār

apnā sar-e-niyāz kabhī to zabāñ uThā

kahtā hai 'qadr' dekh ke tere sukūt ko

kuchh fā.eda kalām se bhī ai zabāñ uThā

KHamosh is tarah se na jal kar dhuan uTha

ai shama kuchh to bol kabhi to zaban uTha

but ban ke chupke fitne na yun meri jaan uTha

munh mein agar zaban hai to lutf-e-zaban uTha

hai koson dur manzil-e-anjam-e-guftugu

tezi ke sath apne qadam ai zaban uTha

Dar hai yahi ki kashti-e-mazmun na Dub jae

rah rah ke itni maujen na bahr-e-zaban uTha

ab daur mein hai rindon ke paimana-e-kalam

phir aa gai bahaar phir abr-e-zaban uTha

kar is qadar na zauq-e-takallum ko sharmsar

apna sar-e-niyaz kabhi to zaban uTha

kahta hai 'qadr' dekh ke tere sukut ko

kuchh faeda kalam se bhi ai zaban uTha