KHamoshi teri chiKH se ye bhed khula hai

ḳhāmoshī tirī chīḳh se ye bhed khulā hai

sannāTe se bhī lipTī huī koī sadā hai

ai zauq-e-nazar dekh tire sāmne kyā hai

kohna hī sahī aañkh pe manzar to nayā hai

vo chāñd na niklā to sitāre bhī the gum-sum

sūraj bhī bahut der se bedār huā hai

chal tujh ko liye jaatā huuñ dikhlāne samundar

dariyā mirī kashtī meñ jo tū baiTh gayā hai

vājib hai ise chuum ke āñkhoñ se lagā.ūñ

ik harf jo tasbīh-e-mohabbat se girā hai

manzil se kabhī merī shanāsā.ī nahīñ thī

rasta hī mirā yaar thā jo ruuTh gayā hai

charchā hai bahut shahr meñ jis mauj-e-numū kā

vo ḳhvāb mirī aañkh se hī Tapkā huā hai

ai sūrat-e-mahtāb tirā haath bhī āḳhir

lahroñ kī ravānī meñ kahīñ chhūT gayā hai

KHamoshi teri chiKH se ye bhed khula hai

sannaTe se bhi lipTi hui koi sada hai

ai zauq-e-nazar dekh tere samne kya hai

kohna hi sahi aankh pe manzar to naya hai

wo chand na nikla to sitare bhi the gum-sum

suraj bhi bahut der se bedar hua hai

chal tujh ko liye jata hun dikhlane samundar

dariya meri kashti mein jo tu baiTh gaya hai

wajib hai ise chum ke aankhon se lagaun

ek harf jo tasbih-e-mohabbat se gira hai

manzil se kabhi meri shanasai nahin thi

rasta hi mera yar tha jo ruTh gaya hai

charcha hai bahut shahr mein jis mauj-e-numu ka

wo KHwab meri aankh se hi Tapka hua hai

ai surat-e-mahtab tera hath bhi aaKHir

lahron ki rawani mein kahin chhuT gaya hai