KHamushi ko sada mein rakkha gaya

ḳhāmushī ko sadā meñ rakkhā gayā

ek jaadū havā meñ rakkhā gayā

chāk-e-jāñ se utaar kar kuuza

sahn-e-āb-o-havā meñ rakkhā gayā

phir murattab kiye ga.e jazbāt

ishq ko ibtidā meñ rakkhā gayā

sañg-e-buniyād thī ḳhalāoñ kī

ek patthar havā meñ rakkhā gayā

ek koñpal sajā.ī achkan par

ek ḳhanjar qabā meñ rakkhā gayā

ek dariyā uThā ke laayā gayā

dasht-e-karb-o-balā meñ rakkhā gayā

mushtahar kī ga.iiñ duā.eñ bahut

aur asar bad-duā meñ rakkhā gayā

mujh ko taḳhlīq se guzārā gayā

aur ḳhudā kī razā meñ rakkhā gayā

inkishāfāt ho chuke saare

mo.ajaze ko anā meñ rakkhā gayā

KHamushi ko sada mein rakkha gaya

ek jadu hawa mein rakkha gaya

chaak-e-jaan se utar kar kuza

sahn-e-ab-o-hawa mein rakkha gaya

phir murattab kiye gae jazbaat

ishq ko ibtida mein rakkha gaya

sang-e-buniyaad thi KHalaon ki

ek patthar hawa mein rakkha gaya

ek konpal sajai achkan par

ek KHanjar qaba mein rakkha gaya

ek dariya uTha ke laya gaya

dasht-e-karb-o-bala mein rakkha gaya

mushtahar ki gain duaen bahut

aur asar bad-dua mein rakkha gaya

mujh ko taKHliq se guzara gaya

aur KHuda ki raza mein rakkha gaya

inkishafat ho chuke sare

moajaze ko ana mein rakkha gaya