KHatir kare hai jam wo har bar ek tarah

ḳhātir kare hai jam' vo har baar ek tarah

kartā hai charḳh mujh se na.e yaar ek tarah

maiñ aur qais o kohkan ab jo zabāñ pe haiñ

maare ga.e haiñ sab ye gunahgār ek tarah

manzūr us ko parde meñ haiñ be-hijābiyāñ

kis se huā do-chār vo 'ayyār ek tarah

sab tarheñ us kī apnī nazar meñ thiiñ kyā kaheñ

par ham bhī ho ga.e haiñ giraftār ek tarah

ghar us ke jā ke aate haiñ pāmāl ho ke ham

kariye makāñ hī ab sar-e-bāzār ek tarah

gah gul hai gaah rang gahe baaġh kī hai bū

aatā nahīñ nazar vo tarah-dār ek tarah

nairañg husn-e-dost se kar āñkheñ āshnā

mumkin nahīñ vagarna ho dīdār ek tarah

sau tarah tarah dekh tabīboñ ne ye kahā

sehat pazīr hue ye bīmār ek tarah

so bhī hazār tarah se Thaharāvte haiñ ham

taskīn ke liye tirī nā-chār ek tarah

bin jī diye ho koī tarah fā.eda nahīñ

gar hai to ye hai ai jigar afgār ek tarah

har tarah tū zalīl hī rakhtā hai 'mīr' ko

hotā hai 'āshiqī meñ koī ḳhvār ek tarah

KHatir kare hai jam' wo har bar ek tarah

karta hai charKH mujh se nae yar ek tarah

main aur qais o kohkan ab jo zaban pe hain

mare gae hain sab ye gunahgar ek tarah

manzur us ko parde mein hain be-hijabiyan

kis se hua do-chaar wo 'ayyar ek tarah

sab tarhen us ki apni nazar mein thin kya kahen

par hum bhi ho gae hain giraftar ek tarah

ghar us ke ja ke aate hain pamal ho ke hum

kariye makan hi ab sar-e-bazar ek tarah

gah gul hai gah rang gahe bagh ki hai bu

aata nahin nazar wo tarah-dar ek tarah

nairang husn-e-dost se kar aankhen aashna

mumkin nahin wagarna ho didar ek tarah

sau tarah tarah dekh tabibon ne ye kaha

sehat pazir hue ye bimar ek tarah

so bhi hazar tarah se Thaharawte hain hum

taskin ke liye teri na-chaar ek tarah

bin ji diye ho koi tarah faeda nahin

gar hai to ye hai ai jigar afgar ek tarah

har tarah tu zalil hi rakhta hai 'mir' ko

hota hai 'ashiqi mein koi KHwar ek tarah