khaDa tha kaun kahan kuchh pata chala hi nahin

khaḌā thā kaun kahāñ kuchh patā chalā hī nahīñ

maiñ rāste meñ kisī moḌ par rukā hī nahīñ

havā.eñ tez thiiñ itnī ki ek dil ke sivā

koī charāġh sar-e-rahguzar jalā hī nahīñ

kahāñ se ḳhanjar-o-shamshīr āzmātā maiñ

mire adū se mirā sāmnā huā hī nahīñ

dukhoñ kī aag meñ har shaḳhs jal ke raakh huā

kisī ġharīb ke dil se dhuāñ uThā hī nahīñ

hamārā shahr-e-tamannā bahut hasīñ thā magar

ujaḌ ke rah gayā aisā ki phir basā hī nahīñ

vo ban gayā mirā nāqid patā nahīñ kyuuñ kar

mirā kalām to us ne kabhī paḌhā hī nahīñ

maiñ apne daur kī āvāz thā magar 'ḳhāvar'

kisī ne bazm-e-jahāñ meñ mujhe sunā hī nahīñ

khaDa tha kaun kahan kuchh pata chala hi nahin

main raste mein kisi moD par ruka hi nahin

hawaen tez thin itni ki ek dil ke siwa

koi charagh sar-e-rahguzar jala hi nahin

kahan se KHanjar-o-shamshir aazmata main

mere adu se mera samna hua hi nahin

dukhon ki aag mein har shaKHs jal ke rakh hua

kisi gharib ke dil se dhuan uTha hi nahin

hamara shahr-e-tamanna bahut hasin tha magar

ujaD ke rah gaya aisa ki phir basa hi nahin

wo ban gaya mera naqid pata nahin kyun kar

mera kalam to us ne kabhi paDha hi nahin

main apne daur ki aawaz tha magar 'KHawar'

kisi ne bazm-e-jahan mein mujhe suna hi nahin