KHadd-o-Khaal se Khaali hai

ḳhadd-o-ḳhāl se ḳhālī hai

ye tasvīr to ja.alī hai

kahte haiñ marg-e-mufājāt

hukm-e-janāb-e-ālī hai

lashkar-e-is.hāl-zada kī

maiñ ne kamān sambhālī hai

duniyā kī āvāz suno

ek hī haath kī taalī hai

har ik insān ke andar

baiThā ek mavālī hai

amla mo.attal hai dil kā

jaarī sa.ī-e-bahālī hai

qīmat alag hai ḳhaslat ek

ye gandum vo shālī hai

sher kī jast ko kaafī bas

mast hiran kī jugālī hai

mat phaTko mujh dil ke paas

ye darvesh jalālī hai

'shafaq'! ab apne baare meñ

kyā afvāh uḌā lī hai

KHadd-o-KHal se KHali hai

ye taswir to jali hai

kahte hain marg-e-mufajat

hukm-e-janab-e-ali hai

lashkar-e-ishaal-zada ki

main ne kaman sambhaali hai

duniya ki aawaz suno

ek hi hath ki tali hai

har ek insan ke andar

baiTha ek mawali hai

amla moattal hai dil ka

jari sai-e-bahaali hai

qimat alag hai KHaslat ek

ye gandum wo shaali hai

sher ki jast ko kafi bas

mast hiran ki jugali hai

mat phaTko mujh dil ke pas

ye darwesh jalali hai

'shafaq'! ab apne bare mein

kya afwah uDa li hai