KHadsha-e-barq-o-sharar yaad aaya

ḳhadsha-e-barq-o-sharar yaad aayā

maiñ jahāñ bhī gayā ghar yaad aayā

bas tirā haath rahā yaad mujhe

sañg yaad aayā na sar yaad aayā

har qadam par thā nishān-e-manzil

tere hamrāh safar yaad aayā

ashk-e-ḳhurshīd kahā thā tujh ko

tū bahut vaqt-e-sahar yaad aayā

dil mirā bahr-e-alam meñ Duubā

jab tirā dīda-e-tar yaad aayā

thā mire sar meñ vafā ka saudā

nafā shab aayā zarar yaad aayā

is qadar ġham pe na socho ai 'ḳhalish'

kyā karoge vo agar yaad aayā

KHadsha-e-barq-o-sharar yaad aaya

main jahan bhi gaya ghar yaad aaya

bas tera hath raha yaad mujhe

sang yaad aaya na sar yaad aaya

har qadam par tha nishan-e-manzil

tere hamrah safar yaad aaya

ashk-e-KHurshid kaha tha tujh ko

tu bahut waqt-e-sahar yaad aaya

dil mera bahr-e-alam mein Duba

jab tera dida-e-tar yaad aaya

tha mere sar mein wafa ka sauda

nafa shab aaya zarar yaad aaya

is qadar gham pe na socho ai 'KHalish'

kya karoge wo agar yaad aaya