KHafa hain is liye wo humse farmaish nahin karte

ḳhafā haiñ is liye vo ham se farmā.ish nahīñ karte

so ham bhī dhuup aur saa.e kī paimā.ish nahīñ karte

zamāna har chamaktī chiiz ko sonā samajhtā hai

hamārā mas.ala ye hai ki ārā.ish nahīñ karte

zarūrat āshkārā kartī hai nām-o-nasab sab kā

vagarna jo hasīñ hote haiñ zebā.ish nahīñ karte

utar saktī nahīñ dil-ā.ine meñ raushnī jab tak

ham us se saaf saarī gard-o-ālā.ish nahīñ karte

zakī har ek ḳhvāhish kī chukānā paḌtī hai qīmat

talab ham is liye ab us se āsā.ish nahīñ karte

KHafa hain is liye wo hum se farmaish nahin karte

so hum bhi dhup aur sae ki paimaish nahin karte

zamana har chamakti chiz ko sona samajhta hai

hamara masala ye hai ki aaraish nahin karte

zarurat aashkara karti hai nam-o-nasab sab ka

wagarna jo hasin hote hain zebaish nahin karte

utar sakti nahin dil-aine mein raushni jab tak

hum us se saf sari gard-o-alaish nahin karte

zaki har ek KHwahish ki chukana paDti hai qimat

talab hum is liye ab us se aasaish nahin karte