KHafa hona zara si baat par talwar ho jaana

ḳhafā honā zarā sī baat par talvār ho jaanā

magar phir ḳhud-ba-ḳhud vo aap kā gulnār ho jaanā

kisī din merī rusvā.ī kā ye kāran na ban jaa.e

tumhārā shahr se jaanā mirā bīmār ho jaanā

vo apnā jism saarā sauñp denā merī āñkhoñ ko

mirī paḌhne kī koshish aap kā aḳhbār ho jaanā

kabhī jab āñdhiyāñ chaltī haiñ ham ko yaad aatā hai

havā kā tez chalnā aap kā dīvār ho jaanā

bahut dushvār hai mere liye us kā tasavvur bhī

bahut āsān hai us ke liye dushvār ho jaanā

kisī kī yaad aatī hai to ye bhī yaad aatā hai

kahīñ chalne kī zid karnā mirā tayyār ho jaanā

kahānī kā ye hissa ab bhī koī ḳhvāb lagtā hai

tirā sar par biThā lenā mirā dastār ho jaanā

mohabbat ik na ik din ye hunar tum ko sikhā degī

baġhāvat par utarnā aur ḳhud-muḳhtār ho jaanā

nazar nīchī kiye us kā guzarnā paas se mere

zarā sī der ruknā phir sabā-raftār ho jaanā

KHafa hona zara si baat par talwar ho jaana

magar phir KHud-ba-KHud wo aap ka gulnar ho jaana

kisi din meri ruswai ka ye karan na ban jae

tumhaara shahr se jaana mera bimar ho jaana

wo apna jism sara saunp dena meri aankhon ko

meri paDhne ki koshish aap ka aKHbar ho jaana

kabhi jab aandhiyan chalti hain hum ko yaad aata hai

hawa ka tez chalna aap ka diwar ho jaana

bahut dushwar hai mere liye us ka tasawwur bhi

bahut aasan hai us ke liye dushwar ho jaana

kisi ki yaad aati hai to ye bhi yaad aata hai

kahin chalne ki zid karna mera tayyar ho jaana

kahani ka ye hissa ab bhi koi KHwab lagta hai

tera sar par biTha lena mera dastar ho jaana

mohabbat ek na ek din ye hunar tum ko sikha degi

baghawat par utarna aur KHud-muKHtar ho jaana

nazar nichi kiye us ka guzarna pas se mere

zara si der rukna phir saba-raftar ho jaana