KHair se hoti rahi rah-numai kya kya

ḳhair se hotī rahī rāh-numā.ī kyā kyā

varna aa jaatī bashar meñ kaj-adā.ī kyā kyā

mo'atabar kaise kaheñ tū ne uḌaa.ī kyā kyā

ai nazar tujh ko ye duniyā nazar aa.ī kyā kyā

be-ruḳhī thī vale bargashtagī aisī to na thī

kyā ḳhabar kis ne vahāñ jā ke lagā.ī kyā kyā

dil ne taslīm kiyā kab ki yaqīñ aa jaatā

us ne ban ban ke magar baat banā.ī kyā kyā

aql hushyār thī dhīre se diyā haath dabā

kyā kahūñ varna mire dil meñ samā.ī kyā kyā

kaise ehsān kiye jaa.eñ saḳhāvat kaise

chhoḌ kar naqsh ga.e hātim-e-tā.ī kyā kyā

maiñ na hābīl na yūsuf na maiñ Tiipū sultāñ

chāhte haiñ mire haq meñ mire bhaa.ī kyā kyā

vo to bohtān lagāne ke liye baiThe haiñ

dil miyāñ bhaa.ī mirā degā safā.ī kyā kyā

Daal kar āñkhoñ meñ āñkheñ jo kahā pahchānā

us ne phir mujh se 'naqīb' aañkh churā.ī kyā kyā

KHair se hoti rahi rah-numai kya kya

warna aa jati bashar mein kaj-adai kya kya

mo'atabar kaise kahen tu ne uDai kya kya

ai nazar tujh ko ye duniya nazar aai kya kya

be-ruKHi thi wale bargashtagi aisi to na thi

kya KHabar kis ne wahan ja ke lagai kya kya

dil ne taslim kiya kab ki yaqin aa jata

us ne ban ban ke magar baat banai kya kya

aql hushyar thi dhire se diya hath daba

kya kahun warna mere dil mein samai kya kya

kaise ehsan kiye jaen saKHawat kaise

chhoD kar naqsh gae hatim-e-tai kya kya

main na habil na yusuf na main Tipu sultan

chahte hain mere haq mein mere bhai kya kya

wo to bohtan lagane ke liye baiThe hain

dil miyan bhai mera dega safai kya kya

Dal kar aankhon mein aankhen jo kaha pahchana

us ne phir mujh se 'naqib' aankh churai kya kya