KHair ummat hain mohabbat hain wafa pyar hain hum

ḳhair ummat haiñ mohabbat haiñ vafā pyaar haiñ ham

amn-e-ālam ke zamāne meñ alam-dār haiñ ham

kyuuñ hameñ log samajhte haiñ ki ġhaddār haiñ ham

roz-e-avval se vatan tere vafādār haiñ ham

jañg-e-āzādī meñ ham ne bhī kiyā ḳhud ko nisār

jaan dene ke liye aaj bhī tayyār haiñ ham

buġhz-o-kīne se kudūrat se hai nafrat ham ko

āshtī-amn-o-mohabbat ke parastār haiñ ham

koī ġham-ḳhvār na monis hai zamāne bhar meñ

ek muddat se musībat meñ giraftār haiñ ham

rabb-e-ālam hai faqat ek sahārā terā

varna duniyā meñ to be-yār-o-madadgār haiñ ham

koī baḌh kar hameñ siine se lagā le ai 'zakī'

tañg-nazarī se adāvat se to bezār haiñ ham

KHair ummat hain mohabbat hain wafa pyar hain hum

amn-e-alam ke zamane mein alam-dar hain hum

kyun hamein log samajhte hain ki ghaddar hain hum

roz-e-awwal se watan tere wafadar hain hum

jang-e-azadi mein hum ne bhi kiya KHud ko nisar

jaan dene ke liye aaj bhi tayyar hain hum

bughz-o-kine se kudurat se hai nafrat hum ko

aashti-amn-o-mohabbat ke parastar hain hum

koi gham-KHwar na monis hai zamane bhar mein

ek muddat se musibat mein giraftar hain hum

rabb-e-alam hai faqat ek sahaara tera

warna duniya mein to be-yar-o-madadgar hain hum

koi baDh kar hamein sine se laga le ai 'zaki'

tang-nazari se adawat se to bezar hain hum