KHala ka KHauf pas-e-parda-e-ghubar nahin

ḳhalā kā ḳhauf pas-e-parda-e-ġhubār nahīñ

hisār-e-ḳhāk se phir bhī koī farār nahīñ

ubuur kar liiñ hadeñ ham ne nā-rasā.ī kī

magar tavālat-e-imkāñ meñ iḳhtisār nahīñ

yahī bahut hai ki miTTī jaḌoñ se lipTī hai

vagarna aaj daraḳhtoñ meñ barg-o-bār nahīñ

kahīñ ye sail-e-safar rā.egāñ na sābit ho

ki justujū ke shab-o-roz kā shumār nahīñ

simaT rahe haiñ vo ik Dūbte jazīre meñ

abhī ye raaz kināroñ pe āshkār nahīñ

zamīñ kī ḳhushk ragoñ meñ ravāñ jo rahtā thā

kanār-e-dasht-e-havas ab vo āb-zār nahīñ

KHala ka KHauf pas-e-parda-e-ghubar nahin

hisar-e-KHak se phir bhi koi farar nahin

ubur kar lin haden hum ne na-rasai ki

magar tawalat-e-imkan mein iKHtisar nahin

yahi bahut hai ki miTTi jaDon se lipTi hai

wagarna aaj daraKHton mein barg-o-bar nahin

kahin ye sail-e-safar raegan na sabit ho

ki justuju ke shab-o-roz ka shumar nahin

simaT rahe hain wo ek Dubte jazire mein

abhi ye raaz kinaron pe aashkar nahin

zamin ki KHushk ragon mein rawan jo rahta tha

kanar-e-dasht-e-hawas ab wo aab-zar nahin