KHamosh rah ke zawal-e-suKHan ka gham kiye jaen

ḳhamosh rah ke zavāl-e-suḳhan kā ġham kiye jaa.eñ

savāl ye hai ki yuuñ kitnī der ham kiye jaa.eñ

ye naqsh-gar ke liye sahl bhī na ho shāyad

ki ham se aur bhī is ḳhaak par raqam kiye jaa.eñ

ka.ī guzishta zamāne ka.ī shikasta nujūm

jo dastaras meñ haiñ lafzoñ meñ kaise zam kiye jaa.eñ

ye goshvāre zabāñ ke bahut sañbhāl chuke

sau she'r kaaT diye jaa.eñ ḳhvāb kam kiye jaa.eñ

terā ḳhayāl bhī aa.e to kitnī der talak

ka.ī ġhazāl mire dasht-e-dil meñ ram kiye jaa.eñ

maiñ jāntā huuñ ye mumkin nahīñ magar ai dost

maiñ chāhtā huuñ ki vo ḳhvāb phir baham kiye jaa.eñ

hisāb dil kā rakheñ ham ki dahr kā 'bābar'

shumār daaġh kiye jaa.eñ yā diram kiye jaa.eñ

KHamosh rah ke zawal-e-suKHan ka gham kiye jaen

sawal ye hai ki yun kitni der hum kiye jaen

ye naqsh-gar ke liye sahl bhi na ho shayad

ki hum se aur bhi is KHak par raqam kiye jaen

kai guzishta zamane kai shikasta nujum

jo dastaras mein hain lafzon mein kaise zam kiye jaen

ye goshware zaban ke bahut sanbhaal chuke

sau she'r kaT diye jaen KHwab kam kiye jaen

tera KHayal bhi aae to kitni der talak

kai ghazal mere dasht-e-dil mein ram kiye jaen

main jaanta hun ye mumkin nahin magar ai dost

main chahta hun ki wo KHwab phir baham kiye jaen

hisab dil ka rakhen hum ki dahr ka 'babar'

shumar dagh kiye jaen ya diram kiye jaen