KHamoshi guftugu hai be-zabani hai zaban uski

ḳhamoshī guftugū hai be-zabānī hai zabāñ us kī

maiñ samjhā thā ki mujh se muḳhtalif hai dāstāñ us kī

mire har samt phailī chāñdnī hai yā hisār us kā

mirā ehsās hai yā raqs meñ parchhā.iyāñ us kī

maiñ ḳhud ko jaise apne paas hī mahsūs kartā huuñ

mire alfāz meñ ras gholtī haiñ shoḳhiyāñ us kī

kahāñ merī tarah sab ko milā zaḳhmoñ kā pairāhan

yuuñ kahne ko to sab par hai nigāh-e-mehrbāñ us kī

shikast-e-shīsha-e-dil kī sadā pahroñ sunā.ī de

agar ik baar uTh jaa.e nigāh-e-mehrbāñ us kī

saverā ho gayā shāyad rihā.ī mil ga.ī us ko

dar-e-zindāñ pe koī rakh gayā hai beḌiyāñ us kī

hare mausam meñ manzar be-libāsī kā kahāñ mumkin

magar turfa hunar ye jāntī haiñ āñdhiyāñ us kī

KHamoshi guftugu hai be-zabani hai zaban us ki

main samjha tha ki mujh se muKHtalif hai dastan us ki

mere har samt phaili chandni hai ya hisar us ka

mera ehsas hai ya raqs mein parchhaiyan us ki

main KHud ko jaise apne pas hi mahsus karta hun

mere alfaz mein ras gholti hain shoKHiyan us ki

kahan meri tarah sab ko mila zaKHmon ka pairahan

yun kahne ko to sab par hai nigah-e-mehrban us ki

shikast-e-shisha-e-dil ki sada pahron sunai de

agar ek bar uTh jae nigah-e-mehrban us ki

sawera ho gaya shayad rihai mil gai us ko

dar-e-zindan pe koi rakh gaya hai beDiyan us ki

hare mausam mein manzar be-libasi ka kahan mumkin

magar turfa hunar ye jaanti hain aandhiyan us ki