KHarab-e-shauq hua jab se is nigah ka dil

ḳharāb-e-shauq huā jab se is nigāh kā dil

charāġh-e-mai-kada hai gaah ḳhānqāh kā dil

na-jāne ḳhāk-nashīñ kis ke intizār meñ haiñ

kanār-e-rāh dhaḌaktā hai kab se raah kā dil

navāzish-e-ġham-e-daurāñ sabhī pe yaksāñ hai

gunāhgār kā dil ho ki be-gunāh kā dil

bahār se bhī numāyāñ hai ishq kā kirdār

ye lahlahātā chaman hai ki be-gunāh kā dil

falāh-e-ḳhalq meñ uThte haiñ nā-gahāñ tūfāñ

dhaḌak rahā hai havāoñ meñ sham-e-rāh kā dil

duā.eñ karte chalo tā-ba-manzil-e-maqsūd

ki rahzanoñ se na mil jaa.e ḳhizr-e-rāh kā dil

tumhārī raah meñ āsār-e-zindagī to mile

hai zarra zarra kisī āshiq-e-tabāh kā dil

sunā hai shā.ir-e-ḳhush-fikr ho gayā 'mānī'

niyāz-mand hai ik husn-e-ḳhush-nigāh kā dil

KHarab-e-shauq hua jab se is nigah ka dil

charagh-e-mai-kada hai gah KHanqah ka dil

na-jaane KHak-nashin kis ke intizar mein hain

kanar-e-rah dhaDakta hai kab se rah ka dil

nawazish-e-gham-e-dauran sabhi pe yaksan hai

gunahgar ka dil ho ki be-gunah ka dil

bahaar se bhi numayan hai ishq ka kirdar

ye lahlahata chaman hai ki be-gunah ka dil

falah-e-KHalq mein uThte hain na-gahan tufan

dhaDak raha hai hawaon mein sham-e-rah ka dil

duaen karte chalo ta-ba-manzil-e-maqsud

ki rahzanon se na mil jae KHizr-e-rah ka dil

tumhaari rah mein aasar-e-zindagi to mile

hai zarra zarra kisi aashiq-e-tabah ka dil

suna hai shair-e-KHush-fikr ho gaya 'mani'

niyaz-mand hai ek husn-e-KHush-nigah ka dil