KHarab ho gaya jab mere jism ka kaghaz

ḳharāb ho gayā jab mere jism kā kāġhaz

to merī ruuh ne pahnā hai dūsrā kāġhaz

guzār dī hai yuuñ hī joḌte ghaTāte hue

savāl hal na hue aur bhar gayā kāġhaz

ġharīb-e-shahr huuñ ghar hai na kārobār koī

kabhī bichhātā kabhī oḌhtā rahā kāġhaz

hurūf raqs-kunāñ ho ga.e achānak hī

laboñ se apne jo us ne kabhī chhuā kāġhaz

vo din bhī yaad haiñ ham ko tumhāre hijrāñ meñ

hamāre beach meñ jab rābta banā kāġhaz

use jo naav banāyā to ġharq-e-āb huā

kuchh aur der to lahroñ se kheltā kāġhaz

adālatoñ meñ bhī jhūTī gavāhiyoñ ke liye

tamām-umr zabāñ kholtā rahā kāġhaz

futūr zehn meñ bhar kar havas ke nezoñ par

uchhāltā rahā ham ko harām kā kāġhaz

KHarab ho gaya jab mere jism ka kaghaz

to meri ruh ne pahna hai dusra kaghaz

guzar di hai yun hi joDte ghaTate hue

sawal hal na hue aur bhar gaya kaghaz

gharib-e-shahr hun ghar hai na karobar koi

kabhi bichhata kabhi oDhta raha kaghaz

huruf raqs-kunan ho gae achanak hi

labon se apne jo us ne kabhi chhua kaghaz

wo din bhi yaad hain hum ko tumhaare hijran mein

hamare beach mein jab rabta bana kaghaz

use jo naw banaya to gharq-e-ab hua

kuchh aur der to lahron se khelta kaghaz

adalaton mein bhi jhuTi gawahiyon ke liye

tamam-umr zaban kholta raha kaghaz

futur zehn mein bhar kar hawas ke nezon par

uchhaalta raha hum ko haram ka kaghaz