khari baaten ba-andaz-e-suKHan kah dun to kya hoga

kharī bāteñ ba-andāz-e-suḳhan kah duuñ to kyā hogā

adū-e-jān-o-tan ko jān-e-man kah duuñ to kyā hogā

nigahbān-e-vatan ko rāhzan kah duuñ to kyā hogā

kisī bhī bad-chalan ko bad-chalan kah duuñ to kyā hogā

ġharībī jin ke latte le ga.ī tā-hadd-e-uryānī

jo maiñ un ismatoñ ko sīm-tan kah duuñ to kyā hogā

añdhere ko añdhere hī kaheñge dekhne vaale

savād-e-shām ko sub.h-e-vatan kah duuñ to kyā hogā

ġhalat bātoñ pe duniyā kab tavajjoh sarf kartī hai

butoñ ko be-zabān o be-dahan kah duuñ to kyā hogā

kahīñ fitrat badal saktī hai nāmoñ ke badalne se

janāb-e-shaiḳh ko maiñ barhaman kah duuñ to kyā hogā

qad o gesū ko tum shamshād o sumbul kah ke kyā loge

qad o gesū ko maiñ dār-o-rasan kah duuñ to kyā hogā

sitāre toḌtī hai jab ki zarroñ kī tavānā.ī

sitāroñ ko tumhārī anjuman kah duuñ to kyā hogā

sadārat ke farā.ez jab adā hone nahīñ paate

agar maiñ tum ko sadr-e-anjuman kah duuñ to kyā hogā

vo but ai 'shād' jab ġhazloñ meñ dilchaspī nahīñ letā

maiñ us kī shaan meñ koī bhajan kah duuñ to kyā hogā

khari baaten ba-andaz-e-suKHan kah dun to kya hoga

adu-e-jaan-o-tan ko jaan-e-man kah dun to kya hoga

nigahban-e-watan ko rahzan kah dun to kya hoga

kisi bhi bad-chalan ko bad-chalan kah dun to kya hoga

gharibi jin ke latte le gai ta-hadd-e-uryani

jo main un ismaton ko sim-tan kah dun to kya hoga

andhere ko andhere hi kahenge dekhne wale

sawad-e-sham ko subh-e-watan kah dun to kya hoga

ghalat baaton pe duniya kab tawajjoh sarf karti hai

buton ko be-zaban o be-dahan kah dun to kya hoga

kahin fitrat badal sakti hai namon ke badalne se

janab-e-shaiKH ko main barhaman kah dun to kya hoga

qad o gesu ko tum shamshad o sumbul kah ke kya loge

qad o gesu ko main dar-o-rasan kah dun to kya hoga

sitare toDti hai jab ki zarron ki tawanai

sitaron ko tumhaari anjuman kah dun to kya hoga

sadarat ke faraez jab ada hone nahin pate

agar main tum ko sadr-e-anjuman kah dun to kya hoga

wo but ai 'shad' jab ghazlon mein dilchaspi nahin leta

main us ki shan mein koi bhajan kah dun to kya hoga