KHas-e-badan mein ba-rang-e-sharar aae koi

ḳhas-e-badan meñ ba-rañg-e-sharār aa.e koī

chamak uThūñ maiñ ġham-e-āb-dār aa.e koī

mirī nazar meñ chamakte haiñ garm-o-sard jahāñ

maiñ jāñch lūñgā zar-e-kam-ayār aa.e koī

hai zaḳhm zaḳhm badan sañg-e-harf-e-talḳh se aaj

kahīñ se narmī-e-lab kī phuvār aa.e koī

maiñ jal gayā dil-e-vīrāñ kī ḳhushk vaadī meñ

farāz-e-dard se phir ābshār aa.e koī

ye dasht-e-tishna-labī chhoḌ kar maiñ kyuuñ jā.ūñ

mire liye to yahīñ jū-e-bār aa.e koī

hai zo.am-e-sho.ala to dekhe havā-e-dard kā zor

charāġh hai to sar-e-rahguzār aa.e koī

ik aur bhī hai jahāñ is jahān-e-jabr se duur

majāl hai to vahāñ shahryār aa.e koī

ġhanīm-e-shab ko maiñ zaḳhmoñ se chuur kar aayā

sahar kā āḳhirī neza bhī maar aa.e koī

Thahar ga.e haiñ kahāñ mere ham-safar 'shāhīñ'

khaḌā huuñ der se jañgal ke paar aa.e koī

KHas-e-badan mein ba-rang-e-sharar aae koi

chamak uThun main gham-e-ab-dar aae koi

meri nazar mein chamakte hain garm-o-sard jahan

main jaanch lunga zar-e-kam-ayar aae koi

hai zaKHm zaKHm badan sang-e-harf-e-talKH se aaj

kahin se narmi-e-lab ki phuwar aae koi

main jal gaya dil-e-viran ki KHushk wadi mein

faraaz-e-dard se phir aabshaar aae koi

ye dasht-e-tishna-labi chhoD kar main kyun jaun

mere liye to yahin ju-e-bar aae koi

hai zoam-e-shoala to dekhe hawa-e-dard ka zor

charagh hai to sar-e-rahguzar aae koi

ek aur bhi hai jahan is jahan-e-jabr se dur

majal hai to wahan shahryar aae koi

ghanim-e-shab ko main zaKHmon se chur kar aaya

sahar ka aaKHiri neza bhi mar aae koi

Thahar gae hain kahan mere ham-safar 'shahin'

khaDa hun der se jangal ke par aae koi