KHat ke aate hi wo mukhDe ki safai kya hui

ḳhat ke aate hī vo mukhḌe kī safā.ī kyā huī

vo manush kīdhar ga.e vo mīrzā.ī kyā huī

ham na kahte the ki pyāre jaan ahl-e-dil kī qadr

ab vo dil kīdhar ga.e vo dilrubā.ī kyā huī

zor kartā hai ik aalam nā-tavānoñ par tire

ai sipahr-e-dūñ tirī zor-āzmā.ī kyā huī

shaiḳh-jī aayā na masjid meñ vo kāfir varna ham

pūchhte tum se ki ab vo pārsā.ī kyā huī

roiye is ġham-kade meñ aah kis kis ko ki yaañ

dekhte nazroñ ke apnī ik ḳhudā.ī kyā huī

ai vafā-begāna thā tū bhī to ham se āshnā

vo vafā kīdhar ga.ī vo āshnā.ī kyā huī

go kisī hālat meñ ho 'qā.em' maiñ samjhūñ huuñ tujhe

hai to tū vo hī pa terī kibriyā.ī kyā huī

KHat ke aate hi wo mukhDe ki safai kya hui

wo manush kidhar gae wo mirzai kya hui

hum na kahte the ki pyare jaan ahl-e-dil ki qadr

ab wo dil kidhar gae wo dilrubai kya hui

zor karta hai ek aalam na-tawanon par tere

ai sipahr-e-dun teri zor-azmai kya hui

shaiKH-ji aaya na masjid mein wo kafir warna hum

puchhte tum se ki ab wo parsai kya hui

roiye is gham-kade mein aah kis kis ko ki yan

dekhte nazron ke apni ek KHudai kya hui

ai wafa-begana tha tu bhi to hum se aashna

wo wafa kidhar gai wo aashnai kya hui

go kisi haalat mein ho 'qaem' main samjhun hun tujhe

hai to tu wo hi pa teri kibriyai kya hui