KHat zamin par na ai fusun-gar kaT

ḳhat zamīñ par na ai fusūñ-gar kaaT

dard-e-sar kāTnā hai to sar kaaT

gar likhūñ us ko nāma-e-ulfat

harf-e-matlab ko de muqaddar kaaT

qatl se mere gar phire qātil

daañt se luuñ zabān-e-ḳhanjar kaaT

gar hai bedād hī pasand tujhe

gardan-e-ġhair ai sitam-gar kaaT

ġham-e-barq-o-tagarg ko na ḳharīd

kisht-e-ummīd ko sarāsar kaaT

vaqt-e-dai zer-e-ḳhār-zār guzār

mausam-e-gul tah-e-gul-e-tar kaaT

pā-e-mardī se dast-burd na chhoḌ

jeb-e-shāh-o-gadā barābar kaaT

quvvat-e-hazm hai ba-qadr-e-zarf

kyā kare mauj-e-āb-e-gauhar kaaT

sabr-o-taslīm hī ke andar rah

'umr rañj-o-ḳhushī se bāhar kaaT

teġh-e-burrān-e-vaqt se har dam

rishta-e-ārzū ko yak-sar kaaT

mat banā ghar chaman ke andar kaaT

mat lagā dil gul-o-sanobar kaaT

āshiyāñ ke liye chaman kā se

murġh-e-hirs-o-havā kā har par kaaT

qadar-e-ārām kuchh to kar mā'lūm

roz dushvār raat dūbhar kaaT

shart kuchh teġh bāñdhnā hī nahīñ

ziist ko aa.e jo mayassar kaaT

ai 'qalaq' rañj ho ki ho ārām

kaaT jaise kaTe subuk-tar kaaT

KHat zamin par na ai fusun-gar kaT

dard-e-sar kaTna hai to sar kaT

gar likhun us ko nama-e-ulfat

harf-e-matlab ko de muqaddar kaT

qatl se mere gar phire qatil

dant se lun zaban-e-KHanjar kaT

gar hai bedad hi pasand tujhe

gardan-e-ghair ai sitam-gar kaT

gham-e-barq-o-tagarg ko na KHarid

kisht-e-ummid ko sarasar kaT

waqt-e-dai zer-e-KHar-zar guzar

mausam-e-gul tah-e-gul-e-tar kaT

pa-e-mardi se dast-burd na chhoD

jeb-e-shah-o-gada barabar kaT

quwwat-e-hazm hai ba-qadr-e-zarf

kya kare mauj-e-ab-e-gauhar kaT

sabr-o-taslim hi ke andar rah

'umr ranj-o-KHushi se bahar kaT

tegh-e-burran-e-waqt se har dam

rishta-e-arzu ko yak-sar kaT

mat bana ghar chaman ke andar kaT

mat laga dil gul-o-sanobar kaT

aashiyan ke liye chaman ka se

murgh-e-hirs-o-hawa ka har par kaT

qadar-e-aram kuchh to kar ma'lum

roz dushwar raat dubhar kaT

shart kuchh tegh bandhna hi nahin

zist ko aae jo mayassar kaT

ai 'qalaq' ranj ho ki ho aaram

kaT jaise kaTe subuk-tar kaT