KHatm shor-e-tufan tha dur thi siyahi bhi

ḳhatm shor-e-tūfāñ thā duur thī siyāhī bhī

dam ke dam meñ afsāna thī mirī tabāhī bhī

iltifāt samjhūñ yā be-ruḳhī kahūñ is ko

rah ga.ī ḳhalish ban kar us kī kam-nigāhī bhī

us nazar ke uThne meñ us nazar ke jhukne meñ

naġhma-e-sahr bhī hai āh-e-sub.h-gāhī bhī

yaad kar vo din jis din terī saḳht-gīrī pur

ashk bhar ke uTThī thī merī be-gunāhī bhī

pastī-e-zamīñ se hai rif.at-e-falak qaa.em

merī ḳhasta-hālī se terī kaj-kulāhī bhī

sham.a bhī ujālā bhī maiñ hī apnī mahfil kā

maiñ hī apnī manzil kā rāhbar bhī raahī bhī

gumbadoñ se palTī hai apnī hī sadā 'majrūh'

masjidoñ meñ kī maiñ ne jā ke dād-ḳhvāhī bhī

KHatm shor-e-tufan tha dur thi siyahi bhi

dam ke dam mein afsana thi meri tabahi bhi

iltifat samjhun ya be-ruKHi kahun is ko

rah gai KHalish ban kar us ki kam-nigahi bhi

us nazar ke uThne mein us nazar ke jhukne mein

naghma-e-sahr bhi hai aah-e-subh-gahi bhi

yaad kar wo din jis din teri saKHt-giri pur

ashk bhar ke uTThi thi meri be-gunahi bhi

pasti-e-zamin se hai rifat-e-falak qaem

meri KHasta-haali se teri kaj-kulahi bhi

shama bhi ujala bhi main hi apni mahfil ka

main hi apni manzil ka rahbar bhi rahi bhi

gumbadon se palTi hai apni hi sada 'majruh'

masjidon mein ki main ne ja ke dad-KHwahi bhi