KHatm teri yaad ka har silsila kaise karun

ḳhatm terī yaad kā har silsila kaise karūñ

duur rah kar maiñ tujhe ḳhud se judā kaise karūñ

par sameTe ḳhud hī baiThā hai parinda ik taraf

jo qafas meñ hī nahīñ us ko rihā kaise karūñ

dekhnā aur dekh kar bas dekhte rahnā tujhe

is tasalsul kī batā maiñ intihā kaise karūñ

mustaqil dīvār se maiñ ne lagā rakkhe haiñ kaan

is meñ chunvā.ī ga.ī chup ko sadā kaise karūñ

dekhtī rahtī huuñ in ko sochtī rahtī huuñ ye

terī āñkhoñ kī zabāñ kā tarjuma kaise karūñ

jā rahā hai jaa.e vo maiñ kis liye rokūñ use

ai mire dil bevafā ko bā-vafā kaise karūñ

ain mumkin hai ki mujh ko ḳhud-kushī karnī paḌe

varna itne sānehoñ kā haq adā kaise karūñ

āzmā.ish kī zarūrat ho na jis meñ 'ā.isha'

ishq meñ us marhale kī ibtidā kaise karūñ

KHatm teri yaad ka har silsila kaise karun

dur rah kar main tujhe KHud se juda kaise karun

par sameTe KHud hi baiTha hai parinda ek taraf

jo qafas mein hi nahin us ko riha kaise karun

dekhna aur dekh kar bas dekhte rahna tujhe

is tasalsul ki bata main intiha kaise karun

mustaqil diwar se main ne laga rakkhe hain kan

is mein chunwai gai chup ko sada kaise karun

dekhti rahti hun in ko sochti rahti hun ye

teri aankhon ki zaban ka tarjuma kaise karun

ja raha hai jae wo main kis liye rokun use

ai mere dil bewafa ko ba-wafa kaise karun

ain mumkin hai ki mujh ko KHud-kushi karni paDe

warna itne sanehon ka haq ada kaise karun

aazmaish ki zarurat ho na jis mein 'aisha'

ishq mein us marhale ki ibtida kaise karun