KHatra sa kahin meri ikai ke liye hai

ḳhatra sā kahīñ merī ikaa.ī ke liye hai

har lamha yahāñ ḳhud se judā.ī ke liye hai

ik haath ko kuchh karne kī aadat nahīñ Daalī

jo dūsrā hai sirf gadā.ī ke liye hai

har shaḳhs kī hai shaam se apnī koī nisbat

mere liye to din se rihā.ī ke liye hai

din saarā guzar jaatā hai ik duurī meñ ḳhud se

aur shaam kisī aur judā.ī ke liye hai

mauqā hai ki ehsān koī us kā chukā duuñ

ik lamha mire paas burā.ī ke liye hai

hai kaun jhaTak de jo kisī dast-e-jafā ko

ye ḳhalq-e-ḳhudā sirf duhā.ī ke liye hai

ab ḳhuuñ ko banānā hai tire hoñT kī surḳhī

bach jā.egā jo dast-e-hinā.ī ke liye hai

tohmat sī koī ḳhud pe lagā rakkhī hai 'shāhīñ'

ik daaġh sā añgusht-numā.ī ke liye hai

KHatra sa kahin meri ikai ke liye hai

har lamha yahan KHud se judai ke liye hai

ek hath ko kuchh karne ki aadat nahin Dali

jo dusra hai sirf gadai ke liye hai

har shaKHs ki hai sham se apni koi nisbat

mere liye to din se rihai ke liye hai

din sara guzar jata hai ek duri mein KHud se

aur sham kisi aur judai ke liye hai

mauqa hai ki ehsan koi us ka chuka dun

ek lamha mere pas burai ke liye hai

hai kaun jhaTak de jo kisi dast-e-jafa ko

ye KHalq-e-KHuda sirf duhai ke liye hai

ab KHun ko banana hai tere honT ki surKHi

bach jaega jo dast-e-hinai ke liye hai

tohmat si koi KHud pe laga rakkhi hai 'shahin'

ek dagh sa angusht-numai ke liye hai