KHayal-e-husn-e-be-misal dastaras mein aa gaya

ḳhayāl-e-husn-e-be-misāl dastaras meñ aa gayā

ḳhudī pe iḳhtiyār merā pesh-o-pas meñ aa gayā

yahīñ kahīñ pe āḳhirī paḌāv zindagī kā hai

tumhārā sog aaj lahja-e-jaras meñ aa gayā

nazar ko pher kar asīr-e-dard kar ga.e ho tum

maiñ ik parind-e-be-navā kisī qafas meñ aa gayā

vo rāstoñ ke pech-o-ḳham sañvārtā chalā gayā

idhar bhī hausla sā kuchh nafas nafas meñ aa gayā

chaman chaman ḳhizāñ kī rut kā ham-safar banā rahā

kuchh aisā rang gulistāñ ke ḳhār-o-ḳhas meñ aa gayā

vo mumkināt kā safar jo tai kiyā gayā nahīñ

gumān se nikal gayā hai ab havas meñ aa gayā

yaqīn se hai bālā-tar ki aaj tak dil-e-‘umar’

kisī ke bas kā thā nahīñ kisī ke bas meñ aa gayā

KHayal-e-husn-e-be-misal dastaras mein aa gaya

KHudi pe iKHtiyar mera pesh-o-pas mein aa gaya

yahin kahin pe aaKHiri paDaw zindagi ka hai

tumhaara sog aaj lahja-e-jaras mein aa gaya

nazar ko pher kar asir-e-dard kar gae ho tum

main ek parind-e-be-nawa kisi qafas mein aa gaya

wo raston ke pech-o-KHam sanwarta chala gaya

idhar bhi hausla sa kuchh nafas nafas mein aa gaya

chaman chaman KHizan ki rut ka ham-safar bana raha

kuchh aisa rang gulistan ke KHar-o-KHas mein aa gaya

wo mumkinat ka safar jo tai kiya gaya nahin

guman se nikal gaya hai ab hawas mein aa gaya

yaqin se hai baala-tar ki aaj tak dil-e-‘umar’

kisi ke bas ka tha nahin kisi ke bas mein aa gaya